Poyingizda xor bo'lgan,
Bag'ringizda tor bo'lgan,
Mehringizga zor bo'lgan,
U mening "QALBIM" edi.
Arzonlarga sottingiz,
Bozorlarda torttingiz,
Yana toshlar ottingiz,
U mening "QADRIM" edi.
Yolg'onlarga almashgan,
Sevaman deb aldashgan,
Sizni tanlab adashgan,
U mening "BAXTIM" edi.
Falaklarga sachradi,
Yomonlardan charchadi,
Mudom sizga uchradi,
U mening "DARDIM" edi.
Yurak qonimdan chiqqan,
Keyin dillarni quchgan,
Qo'llarimdan suv ichgan,
U mening "SABRIM" edi.
Oshiq yurak ko'z ilgan,
Avval ham ko'p qazilgan,
Muhabbat deb yozilgan,
U mening "QABRIM" edi