БАКЫТТЫН АЧКЫЧЫ

Энеси бар бала да, баласы жакшы эне да эч качан эрте карыбайт. Кудрети күчтүү Кудай да: "Бейиш энеңдин таманынын астында" дебеди беле?
Демек, апаңдын ар бир баскан кадамы сен үчүн бейиш. Бейишти өз көзүң менен көргүң келеби? Анда апаңа чын жүрөгүң менен кызмат кыл, Батасын ал. Жамгыр менен жер көгөрөт, бата менен эр көгөрөт.
Тегирмендин ташындай салмак менен айланган дүйнө да бир ордунда турбайт. Сени аярлуу алаканына салып чоңойткон апаң да картаят. Сенин каш-кабагыңды гана карап калат. Аялыңа эмес, эң биринчи апаңа көңүл бур. Себеби "БЕРЕКЕНИН туткасы" энеңдин колунда турат.
Он сегиз миң ааламдын дидары энеңдин бир кубанганына жетпейт. Жылуу сүйлө, эмне берсең да күлүп бер. Ар бир барганыңда кооз көйнөк кийгиз, колуна алтын, күмүш так. Энеңдин жакшы касиеттерин айтып, көңүлүн көкөлөт, балача кубандыр.
Курбулары менен бирге эс алдырууга тырыш. Аңгемесин айтып, ичтеги черин таркатсын. Жакшы ресторанга стол жай. Жаны менен денесин сергите турган мончосун уюштур. Концертке жиберип, алдыңкы катардан орун алып бер, сезими чалкып толкундансын. Ааламдагы эң акылдуу, боорукер баланын энеси экенин сезсин.
Бүгүнкү толуп жаткан коучтар менен психологдор “БАКТЫЛУУЛУК АЧКЫЧЫ” деген темада ар кандай айла-амалдарды айтып, элдин башын айландырып, чөнтөктөрүн кагууда.
Эсиңизде болсун "Бакыттын ачкычы" ата-эненин ыраазычылыгында. "Бейиштин ачкычы" эненин таманынын астында. Кош ачкычты да, сиз бир гана ата-эненизге чын дилден кызмат кылуу менен гана аласыз.
Ата-эненин батасы - жабык эшикти ачып, өчкөн шамды кайра жандырат. Жер бетинде энелердин ыразычылыгы, алардын аруу, аппак, таза ниети чечпеген маселе жок. Андыктан башыңа кыйынчылык түшүп калса, ата-энеңизден кечирим сураңыз. «Мен үчүн Жараткандан тилек тилечи, апа!» «Мен үчүн Жараткандан сурачы, ата!» деп алардын ак батасына муктаж экениңизди эстерине салып туруңуз. Жана өзүңүз да тамыры жок дарак гүлдөбөй турган сыяктуу, ата-энеңиздин ыраазычылыгын албай, женишке жете албай турганыңызды эсиңизден чыгарбаңыз, батадан багың "жанат" бир тууганым...