Nari borsa to‘rt yil kutar dildoring, O‘n yil kutar sadoqatli do‘st- yoring. Lekin otang sabr toshga aylanar, Onang qirq yil ko‘z yummayin kutgaydir. Otang o‘lsa, o‘ldi dema hayot u, Ko‘ksingdagi so‘nmaydigan bayot u. Nogoh agar yo‘llaringda qoqilsang, Onang ruhi qo‘llaringdan tutgaydir. Boshingga ish tushganida sinab ko‘r, G‘amingga g‘am qo‘shganida sinab ko‘r. Kimlaringdir sen deb ko‘z yosh yutar lek, Otang qilich, onang qonlar yutgaydir. Shon-shuhrating ketsa ketar do‘stlaring, Mol-davlating ketsa ketar do‘stlaring. Otang-onang qolar senla, qolgani Shunchaki... ko‘changdan bir-bir o‘tgaydir.