Ölkə başçısının sərəncamı ilə Lənkəranda 359 nəfər birdəfəlik yardım aldı

Prezident İlham Əliyevin Sərəncamına uyğun olaraq “İkinci Dünya müharibəsi” iştirakçılarına, həlak olmuş və ya sonralar vəfat etmiş döyüşçülərin dul arvadlarına, arxa cəbhədə fədakar əməyinə görə orden və medallarla təltif edilmiş şəxslərə birdəfəlik maddi yardımların verilməsi Lənkəranda da təmin edilib. Bildirək ki, ödənilən birdəfəlik maddi yardımların məbləği də ildən ilə artırılır. Belə ki, ötən illə müqayisədə cari ildə bu artım 25 faiz təşkil edib və müharibə iştirakçılarına, müvafiq olaraq 800 manatdan 1000 manata, həlak olmuş və ya sonralar vəfat etmiş döyüşçülərin dul arvadlarına, arxa cəbhədə fədakar əməyinə görə orden və medallarla təltif edilmiş şəxslərə 400 manatdan 500 manata qaldırılıb. Sərəncam Lənkəranda ümumilikdə 359 nəfərə şamil olunub ki, onlardan 9 nəfəri müharibə iştirakçısıdır. DSMF-nin Lənkəran şöbəsindən aldığımız məlumata görə rayonda 184 min manat maddi yardım bankomatlar vasitəsilə onların plastik kartlarına köçürülüb.