Eldar Mansurov - Melodiya

Eldar Mansurov 1952-ci il fevralın 28-də Bakıda İçəri şəhərdə musiqiçi ailəsində anadan olmuşdur. 1968-1972-ci illərdə Asəf Zeynallı adına orta ixtisas musiqi məktəbinin fortepiano sinfində, 1974-1979-cu illərdə Üzeyir Hacıbəyov adına Azərbaycan Dövlət Konservatoriyasının bəstəkarlıq fakültəsində professor Cövdət Hacıyevin sinfində təhsil alıb. "Yeddi gözəl" rok-operası, "Kleopatra" və "Olimp" rok-baletləri, 5 simfoniya, "Mahur-hindi" simfonik muğamı, skripka və simfonik orkestr üçün konsert, bir çox simfonik, kamera və xor əsərlərinin müəllifidir. Bir sıra filmlərə və tamaşalara musiqilər bəstələyib, 3000-dən artıq mahnı və instrumental musiqinin müəllifidir. 1983 və 1987-ci illərdə Səmərqənd şəhərində keçirilən Beynəlxalq simpoziumda muğamların tarixi üzrə məruzələrlə çıxış edib. 1981-ci ildən SSRİ, sonralar isə Azərbaycan Bəstəkarlar İttifaqının, 1999-cu ildən Azərbaycan Kinematoqrafçılar İttifaqının üzvüdür. 2005-ci ildə "Əməkdar incəsənət xadimi" fəxri adına layiq görülüb. 2007-ci ildən Azərbaycan Bəstəkarlar İttifaqının idarə heyətinin katibidir. Ailəlidir, 2 oğlu var. Məşədi Məlik bəy Mansurovun nəticəsidir. Məşədi Süleyman bəy Mansurovun nəvəsidir. Məşhur tarzən Bəhram Mansurovun oğlu Tarzən Elxan Mansurovun qardaşıdır. Kinooperator Aydın Mansurovun qardaşıdır.