Müsəlmanlar Kitab əhlinə şəfqət göstərməlidir

Allah Quranda yəhudi və xristianları Kitab əhli adlandırıb və müsəlmanlarla Kitab əhlinin bir-biri ilə necə rəftar etməli olduqlarını ətraflı izah edib. İslam yaranandan bəri müsəlmanlarla Kitab əhli arasında şəfqət və qarşılıqlı anlayış ön planda olub. Quranda Kitab əhlinin yeməklərinin və qadınları ilə evlənməyin müsəlmanlara halal olduğu bildirilib. Bu haqda ayədə Allah belə buyurur: Bu gün pak nemətlər sizə halal edildi. Kitab verilənlərin yeməkləri sizə halal, sizin yeməkləriniz də onlara halaldır. İsmətli mömin qadınlar da, sizdən əvvəl Kitab verilənlərin ismətli qadınları da, namuslu olub zinakarlıq etməmək və aşna saxlamamaq şərti ilə mehrlərini verdiyiniz təqdirdə sizə halaldır. İmanı inkar edənin əməlləri boşa çıxar və o, Axirətdə ziyana uğrayanlardan olar. (Maidə surəsi, 5) Allah Quranda müsəlmanlara Kitab əhlini “ortaq kəlmədə birləşməyə” dəvət etməyi və bu dəvəti edərkən “ən gözəl tərzdə”, yəni sevgi ilə, şəfqətlə, dostyana üslubdan istifadə etməyi əmr edib. De: “Ey Kitab əhli! Bizim və sizin aranızda olan eyni bir kəlməyə gəlin ki, Allahdan başqasına ibadət etməyək, Ona heç bir şeyi şərik qoşmayaq və Allahı qoyub bir-birimizi ilahiləşdirməyək”… (Ali İmran surəsi, 64) İçərilərindən zülm edənlər istisna olmaqla, Kitab əhli ilə ən gözəl tərzdə mübahisə edin və deyin: “BİZ HƏM ÖZÜMÜZƏ NAZİL OLANA, HƏM DƏ SİZƏ NAZİL OLANA İMAN GƏTİRDİK. BİZİM DƏ MƏBUDUMUZ, SİZİN DƏ MƏBUDUNUZ BİRDİR. BİZ YALNIZ ONA İTAƏT EDİRİK”. (Ənkəbut surəsi, 46) Təbii ki, müsəlmanlar Kitab əhlinin Qurana zidd, batil inanclarında onlarla ittifaq etməz. Amma bu o demək deyil ki, Kitab əhlinə qarşı düşmən kəsilməli, uşaq-qadına baxmadan onları yox etmə düşüncəsində olmalıyıq. Çünki Allahın Quranda bildirdiyi bu xəta və azğınlıqlardan onları edənlər məsuldur. Ayələrdə Kitab əhli içərisində səmimi, dürüst, gözəl əxlaqlı insanların olduğu bildirilir: ONLARIN HAMISI EYNİ DEYİL. KİTAB ƏHLİ İÇƏRİSİNDƏ HAQDAN MÖHKƏM YAPIŞAN BİR CAMAAT VARDIR Kİ, ONLAR GECƏLƏRİ SƏCDƏYƏ QAPANIB ALLAHIN AYƏLƏRİNİ OXUYURLAR. Belələri Allaha, Axirət gününə iman gətirir, yaxşı işlər görməyi buyurur, pis əməlləri qadağan edir və xeyirxah işlər görməyə tələsirlər. Məhz onlar əməlisalehlərdəndirlər. Onların etdiyi yaxşılıqlar əvəzsiz qalmayacaqdır. Allah müttəqiləri tanıyır. (Ali İmran surəsi, 113-115) Həqiqətən, KİTAB ƏHLİNDƏN ELƏLƏRİ DƏ VAR Kİ, ALLAHA MÜTİ OLARAQ HƏM ALLAHA, HƏM SİZƏ NAZİL EDİLƏNƏ, HƏM DƏ ÖZLƏRİNƏ NAZİL EDİLƏNƏ İMAN GƏTİRİR, Allahın ayələrini ucuz qiymətə satmırlar. Onların öz Rəbbi yanında mükafatları vardır. Şübhəsiz ki, Allah tez haqq-hesab çəkəndir. (Ali İmran surəsi, 199) Bütün bu ayələrdən də gördüyümüz kimi, müsəlmanlarla Kitab əhli arasında sevgi dolu, dostyana münasibət olmalıdır.