Lənkəranda Həzi Aslanovun 106 yaşı qeyd edildi

Azərbaycanın hərb tarixinə adını cəsur sərkərdə kimi yazdırmış, tank qoşunları general mayoru, iki dəfə sovet ittifaqı qəhrəmanı adına layiq görülmüş ilk və yeganə azərbaycanlı Həzi Aslanovun bu gün doğum günüdür. Qəhrəman həmyerlimizin anadan olmasının 106 illiyi doğma Lənkəran şəhərində qeyd olunub. Misilsiz rəşadət, böyük sərkərdəlik bacarığı ilə böyük “Vətən müharibəsi” illərində ad qazanmış tank qoşunları general mayoru Həzi Aslanov bu gün hər bir azərbaycanlının xüsusən lənkəranlıların qürur mənbəyidir. Düşmənlə qeyri-bərabər döyüşlərdə belə üstünlük qazana bilən, Volqadan başlamış Baltikədək özünü bacarıqlı sərkərdə kimi sübut edən Həzi Aslanov Moskva, Xarkov, Stalinqrad, Rostov, Taqanroq və digər şəhərlər uğrunda gedən döyüşlərdə mühüm qələbələr qazanıb. Müharibə illərində orden və medallarla təltif olunan sərkərdə, iki dəfə isə sovet ittifaqı qəhrəmanı adına layiq görülüb. Vaxt ötdükcə onun qəhrəmanlığı daha da uzaqlara yayıldı, qəhrəmanlıq səhifələri isə daha da çox parladı. Haqqında neçə-neçə kitablar yazılan, filmlər çəkilən qəhrəmanın təkcə ev muzeyi deyil, şəhərin mərkəzində ucaldılan abidəsi də qəlbində vətən eşqi, yurd sevgisi gəzdirən hər gənc üçün bir qəhrəmanlıq nümunəsi, qürur mənbəyi, and yeridir. Dahi sərkərdənin doğum günündə abidəsi önündə təşkil olunan tədbirdə onun qeyri-adi sərkərdəlik bacarığı haqqında söz açıldı, qəhrəmanın döyüş yolunu əks etdirən şerlər, mahnılar səsləndirildi.