Oqtepa-Xorazm (1-2)

"Хоразм" прессинг қўллаш бўйича намуна бўлди (ВИДЕО) Бу йилги биринчилик баҳсларида Урганчнинг "Хоразм" жамоаси майдондаги баъзи хусусиятлари билан бошқа жамоаларга ўрнак бўлди. Тошкентда ўтказилган ўйинларда жамоа тўп назоратига асосланган ҳужумкор футбол намойиш этгани ҳақида ёзгандим. Ушбу учрашувларда урганчликлар рақибларига бутун майдон бўйлаб прессинг қўллашда ҳам фаоллик кўрсатишди. Хусусан, шу йил 16 октябрь куни Тошкентда ўтказилган "Оқ-тепа"-"Хоразм" учрашувини кўргач, урганчлик футболчилар рақибга бутун майдон бўйлаб прессинг ўтказишни яхши ўзлаштириб, бошқа жамоаларга намуна бўлаётганига гувоҳ бўлди. "Оқ-тепа" футболчиларини учрашувнинг илк дақиқалариданоқ қаттиқ прессингга олган хоразмликлар майдон эгаларини ўз жарима майдони яқинида қоида бузишга мажбур қилишди. Шундай жарима тўпларидан бирини 7-дақиқада қойилмақом бажарган Мурод Отажонов "Хоразм"ни олдинга олиб чиқди. Шуни айтиш керакки, меҳмондаги учрашувда тезкор гол киритган хоразмликлар бошқа жамоаларга ўхшаб, ҳимояга ётиб олишмади ва рақибни прессинг қилишни давом эттиришди. Натижада учрашувнинг биринчи бўлими тўлиқ "Хоразм" устунлигида ўтди. 20-дақиқада уюштирилган чиройли ҳужум натижасида Қадамбой Нурметов томонидан киритилган гол ҳам ана шу прессингнинг меваси бўлди.