ხატებით მსვლელობა და ლგბტ აქტივისტების აქცია თბილისში

17 მაისს თბილისში მართლმადიდებლებმა ოჯახის სიწმინდისა და სიმტკიცის დაცვის დღე იზეიმეს, ლგბტ აქტივისტებმა კი ჰომოფობიასა და ტრანსფობიასთან ბრძოლის საერთაშორისო დღე აღნიშნეს. 17 მაისს ოჯახის სიწმინდის დღესთან დაკავშირებით თბილისში ხათებითა და ლოცვით მსვლელობა გაიმართა. მართლმადიდებელმა მრევლმა სასულიერო პირებთან ერთად ფილარმონიიდან სამების ეკლესიამდე გზა ფეხით გაიარა. დღესვე კათოლიკოს-პატრიარქმა 6-ზე მეტ შვილიან ოჯახს თავდადებული მშობლის ტიტული მიანიჭა. დღესვე ჰომოფობიისა და ტრანსფობიასთან ბრძოლის საერთაშორისო დღე ლგბტ აქტივისტებმა საქართველოში ერთსაათიანი აქციით, კანცელარიის შენობასთან აღნიშნეს. აქციის დასრულების შემდეგ მონაწილეებმა ტერიტორია მათთვის გამოყოფილი სამარშუტო ტაქსებით დატოვეს. ტერიტორიაზე მობილიზებულები იყვნენ სამართალდამცველები, გადაკეტილი იყო მიმდებარე ქუჩები. აქციის დასრულებიდან რამდენიმე წუთში კანცელარიის შენობის მიმდებარე ტერიტორიაზე სასულიერო პირებმა და მრევლმა გადაინაცვლა. მათ ლგბტ აქტივისტების მიერ ჩატარებული ღონისძიება დაგმეს და მოქალაქეებს მოუწოდეს 17 მაისს ოჯახის სიმტკიცის დღე აღნიშნონ. ლგბტ აქტივისტების აქცია ორგანიზებულად, მშვიდ ვითარებაში ჩატარდა- ამის შესახებ ჟურნალისტებს სახალხო დამცველის მოადგილემ განუცხადა.. ეკა სხილაძე აქციის მიმდინარეობას თვალს პირადად ადევნებდა. 17 მაისს ჰომოფობიასა და ტრანსფობიასთან ბრძოლის საერთაშორისო დღეს მსოფლიოს 120-ზე მეტი ქვეყანა აღნიშნავს. 2014 წელს კი საქართველოს კათოლიკოს-პატრიარქმა, აღნიშნული თარიღი ოჯახის სიმტკიცისა და მშობლების პატივისცემის დღედ გამოაცხადა.