ANAMA COCUQ MƏRCANLININ MİNALARDAN TƏMİZLƏNMƏSİNƏ BAŞLAYIB

Azərbaycan Ərazilərinin Minalardan Təmizlənməsi üzrə Milli Agentliyin əməkdaşları Cəbrayıl rayonunun Cocuq Mərcanlı kəndində təmizlik, təhlükəsizlik və kəşfiyyat işlərinə başlayıblar. Kəndin ərazisi mina və partlamamış silah sursatlardan təmizlənilir. Bu, Prezident İlham Əliyevin "Cəbrayıl rayonunun İşğaldan azad edilmiş Cocuq Mərcanlı kəndinin bərpası ilə bağlı tədbirlər haqqında" sərəncamından sonra mümkün olub. Cəbrayıl rayonunun Azərbaycan ordusunun nəzarətindəki yeganə yaşayış məntəqəsi olan Cocuq Mərcanlı kəndi 1994-cü ilin yanvarında erməni işğalından azad olunub. 70 günlük işğal müddətində ermənilər kəndi talan edərək tamamilə dağıdıblar. Bu kənd Lələtəpə yüksəkliyi ətəyində yerləşir. Ulun illər Lələtəpədəki düşmən mövqeləri həm Cocuq Mərcanlı və onun ətrafı, həm də müəyyən qədər Horadiz qəsəbəsi üçün təhlükə yaradıb. Ötən ilin aprelində isə Azərbaycan Ordusunun həyata keçirdiyi uğurlu əks-hücum hərbi əməliyyatı nəticəsində Lələtəpənin işğaldan azad edilməsi Cocuq Mərcanlının təhlükəsizliyini təmin edib və kənddə dinc yaşamaq mümkün olub. Bununla da, tarixən burada yaşamış dinc əhalinin öz doğma yurdlarına qayıtması üçün Azərbaycan Silahlı Qüvvələrinin tam nəzarətinə keçmiş həmin ərazilərdə əsaslı yenidənqurma işlərinin başlanmasına şərait yaranıb. 23 ildir bütün çətinliklərə baxmayaraq, Cocuq Mərcanlını tərk etməyən yeganə ailə olan Həziyevlər indi bütün kəndlilərinin qayıtmasını gözləyirlər. ANAMA əməkdaşlarının Cocuq Mərcanlı kəndində təmizləmə prosesini başa çatdırdıqdan sonra tikinti işlərinə start veriləcək. Kəndin yolu, qaz, işıq, su və kanalizasiya xətləri yenidən çəkiləcək. Vaxtı ilə 220 ailənin yaşadığı Cocuq Mərcanlı kəndi yenidən qurulacaq. Bütün bunlar uzun illərdir dədə-baba yurdunu tərk edib köçkünlük həyatı yaşayan insanların öz obasına qayıtmasına səbəb olacaq.