AİLƏLƏRİ HƏBSDƏ OLAN DİNDARLARA AZADLIQ TƏLƏB EDİRLƏR

"Hicab məhbusları"nın ailə üzvləri cümə axşamı Beynəlxalq Mətbuat Mərkəzində "Dindarların pozulmuş hüquqları və həlli yolları" mövzusunda konfrans keçiriblər. Məhbus Abgül Süleymanovun xanımı ölkənin bütün vətəndaşları kimi hicablı xanımların da təhsil, səhiyyə, iş, vicdan azadlığı hüquqlarının təmin olunmasını önə çəkib. Hicab taxmağın inanclı xanımların hüququ və öz iradəsi olduğu deyilib. Ölkə qanunlarında hicaba qadağa qoyan hər hansı maddə olmadığı vurğulanıb. Amma ölkədə hicablı xanımların məhz hicablı olduqlarına görə şəxsiyyət vəsiqəsi, pasport, təhsil almaq kimi haqlarının tanınmaması hallarının baş verdiyi xatırladılıb. İslam partiyasının sədri Mövsüm Səmədovun xanımı ölkə Konstitusiyasında hicaba qadağa olmamasına diqqət çəkib. Dövlət bayrağı üzərində islami rəngin, dövlət gerbi üzərində "Allah" isminin olmasına toxunub. Amma buna baxmayaraq ölkənin hicab qadağası yaşadığı nəzərə çatdırılıb. Ölkə qanunlarında insanlar arasında dil, din, cins, sosial durum ayrı-seçkiliyi olmadığı yazılsa da hicablı xanımların hicaba görə sıxıntılar yaşamalarının başa düşülən olmadığı qeyd edilib. Hicaba görə xanımların sıxıntı yaşamaları hicab hüquqlarının pozulması kimi dəyərləndirilib. Hicabla təhsilin əlaqəsi olmadığını deyən natiq hicaba görə məktəblinin problemlə üzləşdiyini söyləyib. Bu məhdudiyyətlərin mənasının başa düşülməz olduğunu deyərək iqtidarı buna son qoymağa çağırıb. Mövsüm Səmədovun xanımı bir çox qadınların açıq-saçıq geyinməyi müasirlik saymalarını da tənqid edib. Əsl müasirliyin elmə, savada, biliyə, mənəviyyata sahib olmaqda olduğunu bildirib. Bir çox məhbus ailələrinin üzvləri hicab taxmaqlarını halal-haramı, savab-günahı, azadlıq və haqqı dərk etmələrilə əlaqələndiriblər. Tədbirin sonunda konfrans bəyanat qəbul edib. Sənəddə orta məktəblərdə hicab qadağasına etiraz ifadə edilir və Konstitusiya hüququnun pozulması kimi dəyərləndirilir. Bu hüququn pozulmasına dinc aksiyalarla etiraz edilməsinə diqqət çəkilir. Amma dövlət təmsilçilərinin bu etirazlara zor tətbiq etdiyi, bununla da vətəndaşların sərbəst toplaşmaq azadlığını pozduğu vurğulanır. Bəyanatda həbsdə olan hicab məhbuslarının azad olunmaları, hicab məhbuslarına qarşı qeyri-insani rəftara yol verən məmurların cəzalandırılması tələb edilir.