Həmdulla Əfəndi | Qələgah Kəndi

Azərbaycan Milli Istiqlal hərəkatının fəal iştirakçılarından biri, Azərbaycan Demokratik Respublikasının parlamentinin üzvü Həmdulla Əfəndiyev 1880-ci ildə Dəvəçi rayonunun Qəlagah kəndində ruhani İsmayıl Əfəndinin ailəsində dünyaya gəlib. Deyilənlərə görə, Qori seminariyasının məzunu olub. Həmdulla Əfəndiyev ermənilərin 1918-ci ildə Azərbaycanlılara qarşı həyata keçirdiyi soyqırımı zamanı daşnakların vəhşiliklərinin qarşısını almaqda xüsusi xidmətlər göstərən şəxslərdən olub. O Quba qəza komissarı Əli Bəy Zizikskinin komandanlığı altında ermənilərə qarşı təşkil olunan mübarizə dəstələrində vuruşub. Şabran rayon Qəlagah kənd sakini Ramiz Axundov deyir ki, 1918-ci ildə Samur körpüsündən ölkəyə keçən qırmızı ordunun qarşısını almaq üçün Dəvəçi rayonunun Sarvan dəmiryol stansiyasında naməlum komandirin əmri ilə dəmir yolunun relsləri sökülür və daş qalaqları ilə istehkamlar qurulur. Qırmızı orduya müqavimət göstərən dəstə Həmdulla Əfəndiyə onlara rəhbərlik etməsi üçün xəbər göndərir. Həmdulla Əfəndi silahlılara başçılıq etməyə və Qırmızı ordunun Bakıya irəliləməsinə imkan verməyib. Qəlagahlı Həmdulla Əfəndiyevin nəvəsi Mehman Əfəndiyev söyləyir ki, babası öz ailə üzvlərinin təhsil almasına xüsusi diqqət yetirib. Hazırda Şabran rayonunun Qəlagah kəndində ikimərtəbəli, 10 otaqlı evi var. Lakin bu ev baxımsız vəziyyətdədir. Həmdulla Əfəndiyev həbs olunduqdan sonra, 1927-ci ildə Nargin adasında müəmmalı şəkildə öldürülüb.