Facebokdan kopirovat qilindi.

Klas bosing hamma korsin.
Ассалому алайкум.
Аввало қуйида ёзадиган гапларим учун олдиндан узр сўрайман. Бу ҳақида кўп ўйладим, ёзсамми, ёзмасамми дея иккиландим. Истиҳола қилдим, уялдим, ғурур йўл бермагандек бўлди, одамлар қандай тушунаркин деб иккиландим. Аммо фарзандининг умри учун ота ҳар нарсага тайёр экан. Буни фақат мен каби оталар яхши тушунади холос.
Сизга бошимда бор бир катта ташвиш ҳақида сўзлаб берсам. Менинг икки нафар фарзандим бор. Каттаси Хасанжон, 6 ёш. Кичиги Имомбек, 4 ёш. Хасанжоннинг эгизаки Хусанжон ҳам бор эди, аммо юрагидаги туғма бетоблик туфайли туғилганидан кейин кўп ўтмай Аллоҳ раҳматига олган.
Тақдирни қарангки, ҳозирда Хасанжоннинг ҳам юраги касал, болаликдан ногирон сифатида рўйхатда туради. Аммо шифокорлар унинг касалини даволаса бўлади, тузалиб кетади дея ташхис қўйишган. Норасида жигарбандининг ҳаёти билан боғлиқ бундай ташхис ҳар қандай ота-она учун қадрли, катта умид.
Биз ҳам Хасанжонни ҳаётини сақлаб қолиш учун қўлимиздан келган барча ишни қилдик. Ўзим бир автокорхонада оддий ҳайдовчи бўлиб ишлайман. Турмуш ўртоғим ишламайди. Ота-онам вафот этгач, укамни ҳам қармоғимга олганман. Кам таъминланган оила бўлганимиз учун, давлатимизнинг ғамхўрлиги сабаб, жарроҳлик амалиётини бепул ўтказиш бўйича бепул ордер беришди. Шу ордер орқали 2015 йил 9 март куни Академик В.Воҳидов номидаги Республика ихтисослаштирилган жарроҳлик марказида операция қилишди. Шунақа хурсанд эдим, шунақа хурсанд эдим. Кўз олдимда болажонимни чопқиллаб, шўх-шодон ўйнаб юргани гавдаланар ва севинчим ичимга сиғмас эди. Яратгандан операция яхши чиқсин деб тинмай дуоларда бўлдик. Операция пайти турмуш ўртоғим билан иккимиз неча тирилиб, неча ўлдик, асти қўяверасиз. Бизнинг аҳволимизни фарзанди борлар яхши тушунса керак.
Операциядан кейин 3 ой ўтиб, қайта текширув бўлди. Пешонада шу ҳам бор экан, афсуски текширув яхши чиқмади. Операциядан олдин юракда 11 мм. тешик бор эди, қайта текширтирганимизда эса тешик яна 7 мм. эканлиги маълум бўлди. Мутахассисларнинг айтишича, бу операция ўта муваффақиятсиз қилинганлигидан далолат экан. Шифокорларнинг ўзи ҳам текшириш натижаларидан саросимага тушиб қолишди ва узр сўрашди. Аммо қани эди, битта узр билан ҳаммаси яхши бўлиб кетса.
Аммо шу билан тўхтаб қолганим йўқ. 27 июль куни Salvesis компаниясига Ҳиндистонлик малакали шифокорлар келганидан фойдаланиб, ўғлимни кўрикдан ўтказдим. 1 август куни рентген қилишди. 4 август куни шифокор Muthu Jothi хулоса берди. Унинг айтишича, ўғлимни Ҳиндистонда қайта операция қилиш керак экан. Уни тузалиб кетиши учун умид бор. Фақат бунинг учун операция харажатларини, Ҳиндистонга бориш-келиш чиқимларини кўтариш керак экан.
Бундай чиқимга қўлимиз бироз калталик қилгани учун, операцияни ўзимизда қилмоқчи бўлдим. 10 сентябрь куни яна жарроҳлик марказига бордим ва шифокорларга учрашдим. Уларнинг айтишича, қайта операцияни қилиб беришар экан. Биз рози бўлдик. “Эртага келинглар, операция қиламиз” дейишди. 11 сентябрь куни келдик. Анча кутганимиздан кейин, яна эртага келинглар дейишди. Эртаси куни Хасанжонни кўтариб яна келдик. Бу сафар ҳам кута-кута эшитган гапимиз, “эртага келинглар” бўлди. Шунақа қилиб 4 кун қатнадик. Натижа йўқ, сарсон қилишгани қолди холос. Биз ҳалак, бола ҳалак.
Ростини айтсам, ўшандан буён уларга ишонгим келмаяпти. Ич-ичимдан ишончсизлик бор уларга. Ахир бунга фарзандимнинг ҳаёти тикилганку. Эртага Худо кўрсатмасин, бирон кор-ҳол бўлса, бир умр ўзимни айблаб, афсусланиб ўтмайманми? Лекин бир нарса аниқки, менинг уларга даъвойим йўқ. Улар ҳам атайлаб хато қилишмагандир. Ким ҳам ёш боланинг умри билан атайлаб ўйнашар эди. Тақдиримизда шу бор экан-да, афсус.
Аввало кимга қанча умр бергани, бу фақат Яратганга аён. Биз минг югурсак ҳам, айтганимиз бўлмайди. Бироқ чўкаётган одам хасга ҳам, чўпга ҳам ёпишади дейишади. Миямга бир фикр ёпишиб қолган ва ҳеч тинчлик бермаяпти. Ҳиндистонда операция қилдирсам, ўғлимни соғлом ҳаётга қайтара оламан деб яхши ният қиляпман. Фарзандимнинг шодон кулгусини, барча болалардек югуриб, ўйнаб-кулишини таъминлашим, кўз олдида сўлиб бораётган фарзандини кўриб, ўзи ҳам сўлиб кетаётган турмуш ўртоғимнинг ҳар кунги кўз ёшларига тўсиқ бўлишим учун Ҳиндистон вариантидан бошқаси кўзимга кўринмаяпти.
Бироқ, операция учун кетадиган маблағга имкониятим йўқ. Менга юборилган таклиф хатида операция учун жами 7.500 АҚШ доллари кераклиги, яшаш ва йўлкира алоҳида ҳисобланиши айтилган.
Шу маблағни топиш учун, қариндошлар, ёру биродарлар, таниш-билишлардан илтимос қилдим, қарз сўрадим, ёрдам сўрадим. Дунёда яхши инсонлар бор, шукур, имкон қадар ёрдам қилишяпти. Бироқ барибир бунча катта маблағни топиш осон бўлмаяпти. Яқинда бир танишим интернет орқали ёрдам сўрашимни маслаҳат берди. Қайсидир сайтда Россиялик бир қизни юрагини операция қилиш учун интернет орқали 70 минг АҚШ доллари йиғилганини ўқиб қолганини айтди. Бизда ҳам саховатпеша инсонлар кўмаги билан йиғилиб қолар балки деди.
Танишларимнинг маслаҳати ва ёрдами билан Фейсбукдан профил очдим. Ўзим умримда интернетдан фойдаланиб кўрган одам эмасман. Бироқ, юқорида айтганимдек, фарзандинг учун нима дейишса шунга рози бўлар экансин. Худдики шу иш Сенга мадад берадигандек туюлиб кетаверар экан.
Яхшилар, саҳоватпеша қадрдонлар! Сизлардан илтимосим, кимнинг имконияти бўлса ва кўнглига солган бўлса, операция қилиш учун моддий кўмаклашсангиз, бағоятда хурсанд бўлар эдим. Моддий ёрдам қилиш имконияти ёки хоҳиши йўқлар, Сизлардан илтимос, 6 ёшли ўғлим Хасанжоннинг ҳаққига дуо қилинг. Ўзи шифойи комил ато этсин. Ҳеч банданинг бошига бундай дард тушмасин.
Биламан, ҳозир ҳар хил одамлар бор. Кимлардир сохта ёлғонлар билан, фирибгарлик қилиб, пул топишга ҳам уринишади. Шунинг учун бундай моддий ёрдам сўраб ёзадиганларга доим ҳам ишонаверишмайди. Мени ҳам шундай фирибгарлардан бири деб ўйламаслигингиз учун, керакли бўлган барча ҳужжатларни илова қиляпман: фарзандимнинг паспорти, ташхис вароғи, Ҳиндистондан келган таклиф, Ҳиндистонлик шифокорнинг хулосаси.
Қўшимча маълумот керак бўлса, қуйидаги рақамлар орқали менга мурожаат қилишингиз мумкин:
(93) 507-84-21
(94) 927-76-50
Яшаш манзилим: Тошкент вилояти, Юқори Чирчиқ тумани, Оқовул ҚФЙ, Кавардон 8-уй.
Барчангизга қилмоқчи бўлган эҳсонларингиз ва қилган дуоларингизнинг ажрини берсин. Яна бир бор айтаманки, шунча гапларни ёзишда қанчалар хижолат бўлганимни тасаввур қилолмайсиз. Лекин ўзимга-ўзим фақат битта гап билан тасалли беряпман: ўғлимни ҳаёти учун жиноят ёки шундай ҳаром, қинғир йўлларга кирмаяпман, бировни ҳаққига хиёнат қилмаяпман, тўғри йўлимдан адашмаяпман, ҳеч бўлмаса шунисига шукур.
Ҳурмат билан, Олимжон, Хасанжоннинг отаси.