(وَقَالَ ٱلرَّسُولُ یَـٰرَبِّ إِنَّ قَوۡمِی ٱتَّخَذُوا۟ هَـٰذَا ٱلۡقُرۡءَانَ مَهۡجُورࣰا) [سورة الفرقان: 30]

"Пайгамбар (Мухаммад) айтты: «О, Раббим! Менин коомум бул Куранды жерип койду»" (Фуркан сүрөсү: 30).
Хаафиз ибн Касийр (Аллах ага ырайым кылсын) бул аятты чечмелеп мындай дейт:
"Аллах Таала пайгамбары жана элчиси Мухаммад (ага Кыямат күнүнө чейин дайыма Аллахтын саламы жана салаваттары болсун) жөнүндө кабарлап, анын: «О, Раббим! Менин коомум бул Куранды жерип койду» - дегенин айтып жатат.
Анткени, Аллах Таала башка аятта: "Каапыр болгондор (бири-бирине): «Бул Куранды укпагыла жана ал окулганда маанисиз сөздөрдү сүйлөп киргиле. Балким, ушунуңар менен ага үстөм келерсиңер», - дешти" (Фуссилат сүрөсү: 26) - деп айтып өткөндөй, мушриктер Куранга кулак салып, аны угушчу эмес. Эгерде аларга Куран окулса, алар аны укпаш үчүн күбүр-шыбырды, башка нерселер жөнүндөгү сөздөрдү көбөйтүшчү. Бул болсо аны жеригендиктен.
1) Жана Курандын илими менен аны жаттоону таштоо дагы - аны жеригендиктен.
2) Ага ыйман келтирүү менен аны тастыктоону таштоо да - аны жеригендиктен.
3) Ага ой жүгүртүп, аны түшүнүүнү таштоо да - аны жеригендиктен.
4) Ага амал кылып, анын буйруктарын аткарып, тыюуларынан тыйылууну таштоо да - аны жеригендиктен.
5) Ошондой эле, аны коюп андан башка ыр, же кара сөз, же обон, же оюн-зоок, же ой-пикир, же башкасынан алынган жолго өтүү да - аны жеригенге кирет.
Ошондуктан, Берешен жана каалаган нерсесине Кудуреттүү Аллахтан, бизди Анын ачуусун келтирчү иштерден куткарып, баарыбызды Өзү ыраазы болгон иштерге - Китебин жаттоого, аны түшүнүүгө жана күнү-түнү анын талаптарын Өзү сүйүп, ыраазы болгондой кылып аткарууга жумшоосун сурайбыз. Албетте, Ал - Жоомарт жана Берешен".
(Улуу Курандын тафсири: 3/394)