Alina💖 Murat 👪💞

*СУРОО:* *_Ассаляму алейкум. Суроо берейин дедим эле. Ыйык Куран китепти дааратсыз кармоого болбойт эмеспи. Эгерде Куран китепти телефонубузга көчүрүп алган болсок, демек телефонду да даарат менен кармаш керекпи_*? *ЖООП:* Азыркы кездеги телефондордо окуу үчүн атайын түзүлгөн Куран программаларына Куран китептин өкүмү жүрбөйт. Ал аудио түрүндө болобу, же жазма түрүндө болобу, же сүрөт түрүндө болобу, ага Куранга берилгендей өкүм берилбейт. Мына ошондуктан телефондон Куранды окуган кезде даарат алуу шарт кылынбайт. Ошондой эле туалетке кирген кезде да Куран сакталган телефон менен кирсе болот. Анткени телефондун ичиндеги программа биз жазган тамга менен жазылбайт, ал экилик коддо сакталат, тагыраак айтканда бардык маалыматтар сан түрүндө гана сакталат. Мунун өкүмү адамдын эс тутуму сыяктуу эле. Мисалы, канча деген адамдар Куранды жатка билишет, ал алардын көкүрөгүндө, эсинде сакталуу. Ошол сыяктуу эле телефондогу Куран да телефондун атайын маалымат сактай турган жеринде сакталган. Эгерде Куран сакталган телефон менен туалетке кирүүгө болбойт десек, анда Куран жаттаган адамга да кирүүгө болбойт деген өкүм чыгып калат. Анткени экөөнүн сактоо жолу бири-биринен анчалык деле айырмаланбайт. Ал эми Куран китепти даарат менен гана кармаш керек. Анткени хадисте: "Куранды дааратсыз кармаганга болбойт" - деп тыюу салынганы айтылган.