NƏYİNƏ LAZIM ?
Üzünə ağamsa, sinəsinə dağ,
Hörmətim atamın nəyinə lazım?
Hər yerdə söydürüb nüfuzdan salsam,
Dövlətim atamın nəyinə lazım?
Yağışa bənzəsin dövlətim, varım,
Gümüşdən çiçəyim, qızıldan barım.
Əgər yoxumdursa qeyrətim, arım,
Şöhrətim atamın nəyinə lazım?
Qırılar ürəyi acı söz desəm,
Tez küsər, çağırsa durub gəlməsəm.
Şərəfli bir ömür sürə bilməsəm,
Qeyrətim atamın nəyinə lazım?
Çox gülüb danışan, çox da dərd çəkər,
Üzündən bilinməz, qəlbə qəm əkər.
Süfrəmi haramla bəzəsəm əgər,
Sərvətim atamın nəyinə lazım?
Söndür Ədaləti,əgər yanırsa,
Həqiqət bal dadır kimsə qanırsa.
Uşağım üstümə xoruzlanırsa,
Qüdrətim atamın nəyinə lazım.