Стихотворение, написанное нашим братом ингушом Вахой Хамхоевым о чеченцах.

МАЛАШ-Б УЖ – НОХЧИЙ?
Нохчий-м Дуненна хIанз а бейзабац.
Уж-м хIанзчул тIехьа бовзийта беза.
Цар сурт-сибат ма-дарра гойта а дац.
Могаргдий-те ма-хиллара уж бовза?
Даьла пурмийца дин доаржо бахкийта:
Кунта, Iовда, Докка, Даьда – Нохчий.
Паччахьо эздел дохадича беттара тур увзадаь
инарал Александр а – нохчий овлангара вар.
Дадий-юрт яьккхачара кIаьнк волаш дIавига,
академен-суртхо Пётр а – нохчо ма хиннавар.
Нохчо вар – ког-кулг-бIарг а доацаш тIом баь,
Шамална а къар ца венна къонах – БейсагIар.
Нохчо вар – цун цIи яьккхача хьакимий чIенгаш
гарре ийга, Россена а кхерам тийсса – Заьламха.
Нохчо ма вар – куц-сибата эздий кIант а волаш,
Лоаманхой Республиканна Да хержа – ТIапа.
Нохчо вар – Паччахьалкха Кхеле Кавказа викал,
халкъ сердалга доалош къахьийга – Таьштамар.
Нохчо вецарий – Дунен доалахой цунгара Iемаш,
хьаькъал-да а, деша-говзанча а – Iабдарохьман.
Нохчо веций – Европе фашизм йохош, Эльба-хичу
ший говр лувчаяь, денале бIен-баьчча – Мовлат.
Нохчо вар-кха – цхьанне а ца даьр даь тIемахо,
ийс-бIаь-ткъо моастагIа ше вийна – Ханпаша.
Нохчо вар – къам Мехках даьлча а, тIехьагIа а,
гIелалца даима къийса, цхьалха борз – Хасуха.
Нохчо вар – дин-Iилма а мехка-доал а кара хинна,
ТIом соцабаь, майдане «дIаэтта» – Ахьмад-хьажа.
Нохчо – халкъа сакхетам лаккхарча лагIе баьккха,
хьехамча, йоазонхой хьамсар тхьамада – Абузар.
Нохчо ва – Дунен ялхлагIа Дакъа дохача дийнахьа,
цун кертера хьакимашта хьалха чувена – Руслан а.
(Яздархой-м, наггахьара «извесни чеченски»
дIаваьлча, массе къоаламхо а – визза нохчо).
Аз ца хьоахабаь дукха ба, бовза хьакъ долаш.
ЦIи ца йовза турпалаш а болаш ба нохчий-м.
СибрегIа а ЦIагIа а – бехк-гунахьа ва доацаш,
вийна-венна а де доацаш вейнар а – нохчо вар.
Нохчашта-м шоашта тоам хетац, шойх дувца,
Цудухь боакх аз, гIалгIачо, укх тайпара ловца:
Дала даькъал доахолда шо, бакъдола-нохчий!
Со а вахалва шун во ца гуш, нохчий-вежарий!
- Хамхоев Ваха