Дишагьлийинуб дар, к!

уру, маш дявдин...
( Сабият Кьурбановайиз, Айназ Аьзизовайиз ва, гьацира, му читин вахтна ихь эскрарин сагъламвал уьбхбаъ зегьмет зигурайи к!убан дишагьлийириз бахш вуди)
- Дишагьлийинуб дар, к!уру, маш дявдин,
Алабхъруган аьжлин унт!аъ дийигъуб ...
Улуркьган Ватандиин йигъар читин,
Гьарури ап!ну ккун чахьан удукьруб...
Удукьрубси, удрукьрубра ап!рудар
Ву ихь эскрар, гьацира, духтрар дявдин...
Дурари чпин жанар гьяйиф ап!урдар,
Гуч!вал дубгру, юк!вар вуйси илдандин.
Инсандиз уьмур тувру дишагьлийир
Гъядру дявйир тарихдиъ гьич гъахьундар.
Уч!вру женгнаъ сюгьюрлу хилар хьайи
Дявдин духтрар, уьрхюри жигьил эскрар...
Йигъ - йишв ади гъайгъушнаъ сагъламвалин,
Дурар ву ихь эскрариз чйирси гъахи,
Икрам ап!ураза му к!убанвализ,
Ичв рягьимлувализ аферин аьхю!!!
Учвуз кьувват гьубк!ри ичв кеспнаъ читин,
Уьрхри Первердигари учву вари!
Ккудук!ри му йигъар, йигъар женгарин,
Учвуз ккилигура ичв хизанари...
Сарун мицдар йигъар текрар даришри,
Ихь Жилин ц!ийи зийнарра ишри сагъ!
Вари Дюн' яйиъ Ислягьвалра ибшри!
Алдабхъри дид'ин али яракьдин гъагъ...