Yeni şeirim "Barı salam ver "
Bəlkədə dilində yad olub adım,
Üz üzə gələndə barı salam ver.
Bilim ki ən azı unudulmadım
Üz üzə gələndə barı salam ver.
Keçəndə önümdən gözümə bax keç,
Bir az özgələrdən məni ayır seç,
Gedəndə bir sağ ol deməmişdin heç,
Üz üzə gələndə barı salam ver.
Demirəm keçmişi tez tez varaqla,
Demirəm hər dəfə ara soraqla,
Demirəm görəndə məni qucaqla,
Üz üzə gələndə barı salam ver.
İtirmə özündə saxla xətrimi,
Çevirmə nifrətə qalan sevgimi,
Heç deyil bir köhnə dost tanış kimi,
Üz üzə gələndə barı salam ver
Xəyal Xəzri