РАВ
Рафтӣ? Рав! Такрор овоям макун,
Дар ҳамели ғуссаҳо ҷоям макун.
Дар зимистони ситамҳову ғамат
Бардаи дастони сармоям макун
Рафтанатро орзу доштам, бирав,
То ман аз нав хешро пайдо кунам.
Ман, ки дар бумбасти ишқат гум шудам,
Рав, худамро дар худам эҳё кунам.
Рафтӣ, роҳат бехатар бодо, бирав,
Тир борад аз ҳавоят, барнагард.
Барфу борону тагарги беамон
Гар фурӯ резад ба поят, барнагард.
Рафтанат милоди лабханди ман аст,
Ҳам заволи гиряҳои барҳадар.
Рав, ки фардоям ба нури хандаҳо
Ранг бахшад бар сукути бому дар.
Эй, паноҳат бар Худо, роҳат сафед!
Ман туро аз ёд фардо мебарам.
Бозгаштатро намехоҳам, бирав,
Мурд ишқу мурд шамъи боварам!
Орзу Исо