ДАР ЗОДРӮЗИ УСТОД АЙНӢ
Таърих ҷабрҳо кард, эй бас ба ҷони Айнӣ,
Бас санг хӯрду нашкаст рӯҳу равони Айнӣ.
Тиру камони душман нашкаст иродаашро,
То хома буду дафтар тиру камони Айнӣ.
Эй олими забондон, "лоҳавл" бар забон рон,
Мебоядат гузаштан аз имтиҳони Айнӣ.
Дар тахтапушти Айнӣ дарҷ аст захми миллат,
Оре, нишони миллат бошад нишони Айнӣ.
Тоҷики камбағалро озода хост дидан,
Дохундаҳо, аз ин рӯ, буд қаҳрамони Айнӣ.
Таърихро надидан кӯрист бемуҳобо,
Бояд ба чашми дил хонд ҳар достони Айнӣ.
Ҳаргиз маҷӯ такаллуф дар шеъри содаи ман,
Беҳтар бувад, ки ёбӣ дар он забони Айнӣ.
15-04-2020
ЕКАТЕРИНБУРГ