Ollohim tuproqdan yaratgan banda
Shaytonning borligin unutma qonda.
Riyoga berilib bu imtihonda
Ollohni unutma, Ollohni unutma.
Umring o'taverar tezroq fikr qil,
Bor-u, yo'g'ingga ham mayli, shukur qil.
Hidoyat yo'lini tanla, zikr qil,
Ollohni unutma, Ollohni unutma.
O'tkinchi dunyoning asrorlari ko'p,
Ko'nglingga qo'l solgan bozorlari ko'p.
Tushga ham kirmagan ozorlari ko'p,
Ollohni unutma, Ollohni unutma.
O'zi mo'jizasan buyuk fahming bor,
Bu olam to'rida seni sahning bor.
Goho ayyorsan-u, goho jahling bor,
Ollohni unutma, Ollohni unutma.
Kim bo'lma, ne qilma, manzil qiyomat,
Bir ojiz bandaga qilma malomat,
Iymon-u, Islomga qildim ishorat.
Ollohni unutma, Ollohni unutma!