Зиля Камалетдинова Исанбаева

609. (191, 192, 606, 607, 608) Тик һин
Көтөп алам, буран булып килһәң,
Ҡаршы барам, елдәр булып иҫһәң.
Ҡурҡмам буран-дауылдарҙан,
Һин - минеке, һине һөйәм, тиһең.

Күңелемдә башҡа берәү түгел,
Уйҙарымда, йәнем, тик һин, йәнем, тик һин.

Яҙҙа - ҡояш, йәйен сәскә бул һин,
Күктән ямғыр булып миңә яу һин.
Күңелемдә башҡа берәү түгел,
Уйҙарымда, иркәм, тик һин, тик һин.

Көҙгө елдәр япраҡтарҙы өҙә,
Япраҡ булып алдарыма төш һин.
Төндәремдә мине һаташтыра,
Йоҡо - бүләк, төштәремә кер һин.

608. (191, 192, 606, 607, 609) Йәшәт әле мине яҙҙарҙа
Йәмле яҙҙар миңә бүләк иттең,
Мөхәббәттең күптән көткәнен.
Бар булмышым менән тоям кеүек
Иренеңдә һинең яҙ тәмен.

Яҙҙарымда, йәнем, таптым һине,
Һыуһағанда күңел наҙҙарға.
Һалҡын ҡыштар берүк бүләк итмә,
Мәңге йәшәт мине яҙҙарҙа.

Гөрләүектәр аҡҡан саҡта йырлап,
Ҡарашыңдан һинең эренем.
Гөлдәр кеүек йылы етмәгәндә
Һулыған инем, ҡабат терелдем.

Күңелемдә яҙғы ҡояш булып
Балҡыйһың һин, биреп яҡтылыҡ.
Үҙе бер моң булһын һөйөүебеҙ,
Беҙҙән һуң да эҙе ҡалырлыҡ.

607. (191, 192, 606, 608, 609) Шәмем яна.
Шундай миҙгелдәр бар, көслө ярһыуҙарҙан
Йөрәк телгәләнгән саҡ була.
Һиҙҙермәйсә һаҡлап хата-яңлыштарҙан
Яҡтылығын биреп шәм яна.

Яҙмыш елдәренән һүнмәй яҡты яна,
Шәмем яна, яна саҡ ҡына.
Мөшкөл хәлдәремдән уның яҡтыһына,
Йылыһына йөрәк һыйына.

Ҡаты бәғерҙәр бар, һаҡһыҙ ҡағылыуҙан
Күңелдәрем тулған саҡ була.
Йөрәгемде һаҡлап рәнйеү һалҡынынан
Йылылығын биреп шәм яна.

Күпме ғүмерҙәр бар, бәхет-шатлыҡтарҙан
Яҙмыш айырмаһын шул ғына.
Мөхәббәтте һаҡлап, шундай теләк менән
Беҙҙең икебеҙҙең шәм яна.

556. Янымда ҡыҙым булыр
Тапҡан ана - ана түгел, баҡҡан ана.
Был һүҙҙәрҙең хаҡ икәне таныш миңә.
Кескенәнән бөгөнгәсә баҡҡан атай,
Йән йылымды бүлеп бирәм, ҡыҙым, һиңә.

Үҙ атайың булмаһам да,
Үҙ атайым булмаһаң да,
Һинән йәшәр көс алам.
Мин һин тип янам, балам.
Ышанам, киләсәгемдә, бәхетле күрәсәгемдә
Янда ҡыҙым булыр, тип.
Ышан, килер көндәреңдә, ҡартайған ғүмерҙәреңдә
Янда ҡыҙым булыр, тип.

"Үгәй атай" тигән һүҙ ҙә тура килмәй,
Һин бит өҫтөн был мәғәнәнән, күпкә өҫтөн.
Мин тип типкән йөрәгеңде тойоп үҫтем,
Хәстәрлекле күҙҙәреңде күреп үҫтем.

Һағышланһа күҙкәйҙәрең, алдан күрәм,
Күңелдәрең китек саҡты тиҙ үк һиҙәм.
Ҡыйырһытыуҙарҙан яҡлап, һалҡындарҙан,
Ҡыҙым, һинең яндарыңда йәшәп киләм.