Рӯзӣ аз Аллоҳ бар мо мерасад, Гоҳ ё ногоҳ бар мо мерасад. Гоҳ бо сад меҳнату ранҷу азоб, Муфт гаҳ аз роҳ бар мо мерасад. Ризқи мо гоҳе ба дастони гадо, Гаҳ ба дасти шоҳ бар мо мерасад. Хирмани гандум расад гоҳе ба мо, Гоҳ, аммо коҳ бар мо мерасад. Ризқи мо гоҳе биёяд аз фалак, Гаҳ зи зери чоҳ бар мо мерасад. Баҳри рӯзӣ гаҳ бароем мо зи роҳ, Гаҳ ба рӯи роҳ бар мо мерасад. Рӯзии мо гоҳ дар шоми сиёҳ, Гаҳ зи нури моҳ бар мо мерасад. Гар Худо хоҳад ба пирӣ мерасем, Варна умр кӯтоҳ бар мо мерасад. Сарнавиште, ки Худо бинвиштааст, Хоҳ ё нохоҳ бар мо мерасад.