Sənə təslim elədim nəfsimi iman yerinə,
Sənin eşqindi axır vücudumda qan yerinə,
Qədəmin dəydiyi torpağı yığıb saxlamışam,
Çəkirəm nuri gedən gözlərə dərman yerinə...
Mən sənin eşqivə adəmliyi tərk eyləmişəm,
Nə ola kimsə məni qoymasa insan yerinə...
İstəsən çəkməy əgər rəsmə bu dünya şəklini,
Çək mənim gözlərimin əksini ünvan yerinə...
Yazmışam kipriyinə namə cavab gözləyirəm,
Bağrımın başını qeyd etmişəm ünvan yerinə...
Çək qılınc qaşları, çatdır sona eşqin həccin,
Sənə qurbandı bu can kəs məni qurban yerinə..!