Левая колонка

Мая Салампи Селендеева (Скворцова)

Последний визит: 08:02

Фильтр

Заметки Увлечения

вчера 19:42

САНА ЮРАТНӐ ПЕК ЮРАТАЙМАРӐМ ЭП...

Сана юратнӑ пек юратаймарӑм эп...
Чылай ҫул иртрӗ ӗнтӗ... Манмалла... Пӗлеп...
Тӗлкӗшленет хӗлхемӗ чунӑмра: ҫат-ҫат...
Чӗрех юратӑвӑм... Сӳнмен... Ҫунать кӑвайт.

Пурнатӑн эсӗ шӑпӑр ҫумӑр сассинче...
Куҫҫуль пулса йӗпеннӗ чӳрече ҫинче
Чупаҫҫӗ тумламсем. Чӗрем суранӗсем.
Иртни. Хальхи. Ма лӑпланмаҫҫӗ-ши ҫаксем?

Килсе хуплать те тӳпери сенкер тӗсе
Пӗр ушкӑн сӑрӑ пӗлӗт - эп сирем тесе
Тӑпӑлтататӑп. Куҫусем инҫе-инҫе...
Утмӑлтурат ҫеҫки. Тӳпеччӗ вӗсенче.

Ыталӑп теприне. Ман чунӑмра пӗрех,
Юратӑвӑм, пӗртен-пӗрскерӗм, эсӗ ҫех.
Ӗшеннӗ ҫил те сан ятна илсе килет,
Пӑшӑлтатать те ҫухалать. Ҫапла тивлет...
29. 01. 2026. Мая Салампи

Тивлет - шӑпа

Мая Салампи Селендеева (Скворцова)

27 янв

ЭСӖ, ЭПӖ - ПӖР ТӖНЧЕ

Ҫакӑ ҫутӑ ҫӗр ҫинче
Эсӗ, эпӗ - пӗр тӗнче.
Эпӗр пурте пӗр кӑкран,
Пӗр юнран, пӗр тымартан.

Эсӗ - вырӑс, эп - чӑваш.
Пурте тус пире, юлташ.
Тӗрлӗ халӑх - пӗр ҫемье,
Туслӑх кирлӗ этеме.

Эп пуплетӗп чӑвашла,
Эсӗ, тусӑм, вырӑсла.
Пур чӗлхе мана тӑван,
Туслӑхра тӗнче аван.

Йывӑр килӗ тӑлӑха,
Ҫил те авӗ хӑраха.
Пирӗн вӑй вӑл - пӗрлӗхре,
Ҫӗнтереймӗ ют пире.

Пурӑнар-и юратса,
Пӗр-пӗрне сума суса?
Ҫӗр-Анне пурне пӗрре,
Пӗр хӗвел. Тӳпе пӗрре.

Пур - пӗрле, ҫук - ҫурмалла.
Пирӗн мӗн уйӑрмалла?
Пурнӑҫ пултӑрччӗ тату,
Ялкӑш ӗмӗр, юрату!

Кил, тӑванӑм, хӑнана,
Ыр сунса кӗтеп сана.
Вырӑс, мӑкшӑ е тутар -
Тус-тӑванлӑ пурӑнар!
27. 01. 2026. Мая Салампи

Мая Салампи Селендеева (Скворцова)

25 янв

Студентсен кунӗпе, Тусӑмӑрсем 🥰 🌼 Чун-чӗрепе яланах ҫамрӑк пулар!

СТУДЕНТ

Кам студент пулса курман,
Яшлӑха туллин туйман.
Мӗн тери хавас ҫулсем!
Ҫил ҫунатлӑ вӑхӑтсем!
Пурнӑҫ ҫӑлкуҫла тапать,
Чунсенче - сӳнми хӑват.
Ҫамрӑк, ҫӑмӑл та хивре,
Вут-кӑвар шух чӗрере.
Ӑс-тӑну пур - туптама,
Ҫамрӑк вӑхӑт - юратма.
Тус-юлташ та туллиех,
Пурнӑҫ савӑк та питех.
Янкӑс кулӑ ян та ян!
Ак мӗнпе студент пуян!
Сессирен те сессиччен
Шутламастӑн ним ҫинчен.
Ӑнӑҫу пулсан ҫумра
Аптӑрамӑпӑр вара.
Вырӑн ҫук-ҫке тунсӑха,
Пурнӑҫу, чӑнах, паха.
24. 01. 2026. Мая Салампи

Мая Салампи Селендеева (Скворцова)

23 янв

ЧУН САВНИҪӖМ, ЭС - ЧЕЧЕК ♥️

Улӑхра ҫеҫке нумай,
Илӗртет пӗри пӗрмай.
Ӑнланмастӑп мӗншӗнне,
Тек пӑхатӑп ҫав енне.

Сар хӗвел пек туйӑнать,
Чунӑм йӑпӑшт хускалать.
Вылянать чечек тӑрук!
Пит чечен-ҫке... Айтуру!

Чун савниҫӗм пулчӗ ҫав,
Шевлелле йӑл кулчӗ, ав.
Мӑшӑр куҫӗ - ик ахах,
Вӗсенче путатӑп, ах!..

Пуҫӑма ҫухатрӑм эп,
Сансӑр халь саҫҫем пӗтеп.
Тунсӑхлатӑп. Ҫит каҫчен,
Кӗмӗл уйӑх тухиччен.

Чун савниҫӗм, эс - чечек,
Сан ҫинчен шутлатӑп тек.
Эсӗ мӗн туятӑн-ши?
Ман пекех саватӑн-ши?
23. 01. 2026. Мая Салампи