Левая колонка

Людмила Семенова(Ульянова)

Последний визит: 20:16

Фильтр

Заметки Увлечения

Людмила Семенова(Ульянова)

26 дек

Ҫӗн ҫула хапӑллар
Ак каллех тепӗр ҫул та хыҫра.
Мӗн калас? Ӳпкелес е мухтас?
Вӑхӑт-вӑхӑт вӑл пулчӗ кӑра -
Ҫилӗпех турткаланчӗ пулас.

Ҫав-ҫавах тав тӑватӑп Турра.
Кашни кунӑм - парне, хӑй телей.
Ир тӑрсан ҫывӑх ҫыннӑм ҫумра -
Алла-аллӑн утма пур мехел.

Ҫӗнӗ ҫулӗ васкать - хапӑллар -
Ырӑпа, кӑмӑлпа килтӗрех!
Ырлӑх-сывлӑх, телей, пархатар
Парнелетӗр пире кашнинех.
Людмила Семенова

Людмила Семенова(Ульянова)

25 дек

Пултӑр ӗмӗр
Ман халӑхӑм ӑста ӳнерҫӗ -
Куҫ тулли тӗрри-эрешӗ!
Капӑр тумӗ, ыр кӗпийӗ -
Кур-ха, кур - уяв илемӗ!

Йӑлтӑр-йӑлтӑрти тӗсевлӗ,
Чӑнкӑр-чӑнкӑрти кӗввиллӗ,
Ытарма ҫук кӗмӗл капӑр
Пулнӑ, пултӑр, савӑнтартӑр!

Шӑнкӑр-шӑнкӑр шыв юххи пек,
Чӗвӗлти чӗкеҫ юрри пек
Чун ахахӗ - ыр чӗлхемӗр-
Чӗвӗлтеттӗр ӗмӗр-ӗмӗр!

Тӑван халӑх ывӑл-хӗрӗ
Пултӑр вӑйлӑ, ӑслӑ, чӗрӗ.
Чун-чӗри ырра илентӗр,
Тӑван халӑхшӑн хӗмлентӗр.
Людмила Семенова

Людмила Семенова(Ульянова)

2 дек

Хитреччӗ хурӑн...
Кӑтраччӗ хурӑн, ҫав тери хитреччӗ!
Ял варринче ларатчӗ сарӑлса.
Касрӗҫ те тӑкрӗҫ! Кам алли ҫӗкленчӗ?
Пӗр шелсӗр-пилсӗр ячӗҫ-ши вутта?

Кашни иртмессерен пӑхса иртетӗп
Ҫак вырӑна - пуш-пушӑ, тем ҫитмест...
Вӑхӑтсӑрах ун татӑлнӑшӑн ӗмӗр
Кам айӑплӑ? Кам калӗ? Кам пӗлет?

Ӑҫта илем тата ӑҫта тискерлӗх -
Эс ҫын пулсассӑн уйӑрма кирлех!
Чунсӑрлансах пырать-ши халь этемлӗх -
Касаҫ-ваклаҫ капмар юмансенех.

Ахлатать, йӗрет ав ҫӗр-аннемӗр-
Суранӗсем пит кайрӗҫ тарӑна...
Эй, Турӑҫӑм, Пӳлӗхҫӗ, илтсемӗр -
Пур шанчӑк та паян сирте кӑна!
Людмила Семенова

Людмила Семенова(Ульянова)

1 дек

Иртни хӑратмасть

Кӗре ӑсататпӑр,
Хӗле хапӑллатпӑр.
Ӑсатса та кӗтсе ҫапла пурӑнатпӑр.

Халь ҫеҫчӗ чипер хӗр,
Унтан сапӑр арӑм...
Сисмерӗм - ҫуллантӑм - ватлӑха утатпӑр.

Сыв пултӑр кивви,
Ҫӗнни савӑнтартӑр.
Иртни хӑратмасть, чун ҫеҫ ан чуллантӑр.
Людмила Семенова