ХАНИ НҮХЭДТӨӨ

Зүрхэн соогоо хадагалhан,
Зүүдэн соогоо манаhан,
Сэдьхэл соохи гунигаа
Шүрэ hубhаар үлхэжэ,
Шүлэг нүхэдтөө зорюулнаб!
Гүрлөө ута гэзэгэтэй,
Гүрбэлзэмэ уян бэетэй,
Гүлмэр сэбэр шарайтай,
Гүн сагаан сэдьхэлтэй-
Харахан урин нюдэдэйнь
Харбаhан хурса годлинууд,
Хүбүүдэй залуу зүрхэнүүдые
Хүлгүүлэн шархатааха шадалтай,
Дуулажа, хатаржа шалгарха,
Дурлажа, нүхэсэжэ шадаха,
Даруу, даамай, шураншье
Дангина басагад ябаа hэмди !
Гүлмэр залуу басагаднай
Гүрэн түрын ажалтай,
Шуран сэбэрнүүд зандаа,
Шамбай сарюун абгайнар,
Шадамар бэрхэ эжынэр болонхой
Шуумайн ябадаг даа, уулзахада...
Оо-оо хүбүүднай - манай хүбүүд...!
Сэхэ харахада далтирхаар,
Амияа татаад, амилангүй,
Зүрхэеэ баряад, hалгануулангүй,
Нюусаар hанаа алдахаар
Сэбэрнүүд hэн даа, хүбүүднай !
Мүнөө тэрэл зандаа
Мохоо үгы зоригынь,
Мохитоо үгы хоолойнь,
Түшэг, тулга, томоотой
Түбшэн, түни зантай
Холо ойгуур түбхинэhэн,
Хүндэтэй hайнууд байдаг даа.
Ороходоо үүдээрээ гэлсэдэг,
Омог дундаа уулзаhан,
Охин дундаа ушарhан,
Ороhон сэбэр бэреэднай,
Оройлhон хүдэр хүрьгэднай
Одоол гарзатахаар бэшэ даа.
Наhанай нангин харгын
Найдамтай нүхэд гээшэл даа !
Дали жэгүүр ургаhан шэнги
Даншье түргэн үнгэршэбэ,
Дүшэн тэгшэ жэлнүүд,
Дүшэн хурдан хүлэгүүд.
Түрэhэн нютагайнгаа энгэртэ,
Түрэл hургуулиингаа хойморто
Альгаа дэлгээн уулзаял даа,
Амар мэндэеэ хэлсэел даа !
Залуу наhаяа hанажа,
Зүрхэ сэдьхэлээ ханажа,
Золгожо хүхиел даа,садатараа,
Зоргоороо хөөрэлдэел даа, уулзажа.
1969 ондо Сагаан-Уулын дунда hургуули дүүргэhээр 40 жэлэй уулзалгада зорюулжа 2009 ондо бэшэгдэhэн зорюулга - шүлэг