როგორ გავხადოთ ოჯახის წევრებს შორის ურთიერთობა იმაზე კარგი, ვიდრე დღესაა?

თუმცა ჩემზე უკეთესადაც გამოგდით ალბათ და იცით, მაგრამ მე მაინც თავი გამოვიდე. :)))
ამის მზა "რეცეპტი" არ არსებობს, მაგრამ არის მრავალი წლის გამოცდილება, რომელიც ანგარიშგასაწევია. ახლა რასაც წაიკითხავთ ჩემებური მიდგომაა. თუმცა, ყველა ადამიანთან ურთიერთობა ინდივიდუალურია. ვფიქრობ, ჩემი "ნაშრომი" ცოტათი მაინც უნდა იყოს საინტერესო ჩემი მეგობრებისთვის:
*************************************************************************************
როცა მეუღლე სახლში ბრუნდება, კარი თვითონ გაუღე და გაღიმებული შეეგებე, მაშინც კი, როცა ძალიან მძიმე დღე გქონდა.
შენთან ერთად ბავშვებიც თუ შეეგებებიან, მოიკითხავენ, გადაკოცნიან, იცოდე, მთელი დღის დაღლილობას თუ უსიამოვნებას დაავიწყებთ ოჯახის მამას და დარწმუნებული იყავით, რომ მას ყოველთვის მოეჩქარებოდეს იქნება სახლში.
სანამ არ დააპურებ მეუღლეს ან შვილებს, არც ერთ თემაზე არ ესაუბრო, მითუმეტეს პრობლემებზე.
თუ შეიძლება საუბარი მეორე დილისთვის გადაიდოს, სჯობს, ღამე არ გააღიზიანო საყვარელი ადამიანი, ამით არც ძილს დაუფრთხობ და არც ჯანმრთელობას დაუზიანებ.
შეეცადე მეუღლესთან ერთად ისაუზმო, ისადილო, ივახშმო, რა თქმა უნდა თუ არის ამის საშუალება.
ჭამის დროს მეუღლემ თავი მარტო არ უნდა იგრძნოს. ამას მიაჩვიე შვილებიც.
ერთობლივი ვახშამი უნდა ტრადიციად აქციო, მას სხვა ამაღლებული დატვირთვა რომ ჰქონდეს. ამ დროს სუყველა ერთმანეთს ელოდება და შემდგომ უზიარებს დღის ამბებს.
ვახშმის შერჩევისას ოჯახის წევრების გემოვნება უნდა გაითვალისწინო.
სამი დღე ზედიზედ ერთნაირი ვახშამი არ დაახვედრო, ეს ცუდ განწყობაზეც აყენებს, არაფერს ვამბობ იმაზე, რომ უკვე სასარგებლოც აღარ იქნება.
რაციონიდან ამოიღე ცომი, ხორცი, ცხიმი, ძლიერი ყავა და ჩაი.
ვახშამი უნდა დამთავრდეს დაძინებამდე 2 საათით ადრე.
ოჯახის წევრები ყოველთვის უნდა გრძნობდნენ ჩვენგან მზრუნველობას და ყურადღებას. იმას, რომ ისინი მარტო არასოდეს იქნებიან პრობლემებთან. და რომ მშობლები მუდამ გვერდით ეყოლებათ, მთავარია გულწრფელი საუბრები ყველა თემაზე.
ბავშვებმა უნდა იცოდნენ, რომ არ არსებობს აკრძალული თემები და შეცდომები, რისი გამხელაც არ შეიძლება მშობლებთან. მშობლები მათი მეგობრებია.
ყველა შეცდომა შეიძლება გამოსწორდეს.
დღის განმავლობაში უნდა შეეხმიანო მეუღლეს და შვილებს. რა თქმა უნდა თავის მომაბეზრებელ კონტროლს ან გამუდმებულ რეკვას არ ვგულისხმობ.
თუ შეგიძლია პრობლემები თვითონ მოაგვარო, ააცილე ოჯახის წევრები, დაიცავი ყოველდღიური გაწამაწიისგან.
თუ მეუღლესთან სადაო საკითხები დაგიგროვდა, მასთან განმარტოებით, ერთი-ერთზე ისაუბრე. ამ საუბარს შვილები არ დაასწრო.
ხმამაღალი საუბრები ცუდი მაგალითია ბავშვებისთვის. არავითარ შემთხვევაში არ დაუშვა ასეთი შეცდომა.
შვილებმა უნდა იცოდნენ, რომ დედ-მამა ერთი მთლიანობაა და ისინი ყველა საკითხს ერთობლივად წყვეტენ.
არასოდეს უნდა თქვა მამის საყვედური შვილებთან. არც დედამთილის, მამამთილის, მულის... მოკლედ, შვილების მამის ნათესავების მიმართ აგრესია არასოდეს გამოხატო.
ყველა თემაზე საუბარი შეიძლება, თუ შეგიძლია ინდივიდუალური მიდგომა მეუღლესთან და შვილებთან.
მძიმე თემებს იუმორიც გაურიე შეძლებისდაგვარად, ასე უფრო მსუბუქად მიაწოდებ არასასურველ ინფორმაციას.
მტრებზე ნუ დაიბოღმები და ოჯახის წევრებს მათზე ნუ გააქეზებ.
თუ ოპონენტი უღირსია, მასზე არც ღირს ყურადღების გამახვილება., დააიგნორე. არ შეიძლება ოჯახის წევრების დაგეშვა, გაქეზება. ამით მტრის თანამოაზრე ხდები და მასავით აგრესიული.
არასოდეს დაიზარო საუბარი ოჯახის წევრებთან, მაშინაც კი, როცა დაღლილი ხარ. კომუნიკაცია გაახლოებს და ხშირად მეტ საქმეს აკეთებს ვიდრე სკოლა, ინსტიტუტი თუ ქუჩა..
ყოველთვის გულღიად შეეგებე შვილის მეგობრებს, ისინი ხომ მათი სულის ნაწილია. არასოდეს თქვა უარი მათ გვიანობამდე დარჩენაზე, ღამისთევაზე, ერთობლივ ექსკურსიასა თუ კულტურულ ღონისძიებებში შვილების გაშვებაზე.
არასოდეს იჭორაო არავისზე, მითუმეტეს, სხვის პირად ცხოვრებაზე, ამით ცუდ გემოვნებას უყალიბებ შვილებს.
ყველაზე მძიმე წუთებში აჩვენე სიმშვიდის, მოთმინების მაგალითი. თუმცა არასოდეს ითამაშო ძლიერი. როცა გეტირება იტირე, რომ ოჯახმაც ნახოს შენი ტკივილი თუ სიხარული.
საკითხავი ლიტერატურა სწორად შეურჩიე შვილებს. არ დააძალო, თორემ შეიძლება არც დაინტერესდნენ.
სიყვარულს არ ასწავლიან, მხოლოდ საკუთარი მაგალითით უნდა მიახვედრო, თუ რას ნიშნავს გიყვარდეს, უყვარდე.
შვილებს უნდა გამოუმუშაო პასუხისმგებლობის გრძნობა. მათ უნდა იცოდნენ რომ ერთმანეთზე ზრუნვა აუცილებელია, რომ ყველამ კარგად ვიცხოვროთ ერთად და სამუდამოდ.
შვილებს უნდა ასწავლო ფულთან ურთიერთობა. მათ უნდა გაარჩიონ ჩუქება, სესხება, მოპოვება, განაწილება, დახარჯვა, დაგეგმარება...
ხშირად ამუშავე მიწასთან ბავშვი, ასწავლე ყვავილის დარგვა, გადარგვა, მორწყვა, უთხარი, რომ ამას თუ არ გააკეთებს, შეიძლება ყვავილი ან ხე მოკვდეს. მხოლოდ მისი პასუხისმგებლობით შეიძლება გაყვავდეს ირგვლივ ყველაფერი.
მოუყვანე შინაური ცხოველები, ფრინველები. აჩვენე თუ როგორ უნდა მოუარო მათ, რომ სიყვარულითვე გვიპასუხონ...
ხშირად უთხარი ოჯახის წევრებს, რომ კარგად გამოიყურებიან, რომ უხდებათ ეს ტანსაცმელი თუ მაკიაჟი...
არ დაიზაროთ, ერთმანეთს უთხრათ, რომ გენატრებოდათ მთელი დღე, რომ ნერვიულობდით მათზე...
და კიდევ, ეგებ შევძლოთ ოჯახის წევრებს დავანახოთ, რომ ეს ცხოვრება მართლა წუთისოფელია...
ძლიერად ჩაჰკიდეთ ხელი და აგრძნობინეთ ერთმანეთს ამ ღვთიური ერთობის ძალა.
გფარავდეთ უფალი! ჩემო ძვირფასო მეგობრებო...
/ ბელა ალანია /