"დღეს ყველა მძულხართ, გუშინ მიყვარდით...

"რა შეიცვალა?" _ იკითხავთ ალბათ.
ჰო, ასე მოხდა გადამიყვარდით,
აღარ მოგიწევთ მიღიმოთ ყალბად...
განთავისუფლებთ ყურადღებისგან,
დროს არ წაგართმევთ, დრო ხომ ფულია?!
დილიდან ვრეკავ, არვინ პასუხობს...
თქვენი გულებიც გამორთულია...
მე დამაბრალეთ, ჩემი ბრალია
თქვენ დანაპირებს რომ არ ასრულებთ,
ჯერ მეგობრობის დაწყებას მყვედრით,
მერე კითხულობთ რატომ ვასრულებ?!
ვერ დაგიფასეთ, მე უღირსი ვარ,
წაქცეულს ხელი არ შემაშველოთ...
წყეულიმც ვიყო, თუ ერთხელ მაინც,
თქვენზე ცუდი ვთქვა, ან შეგაჩვენოთ...
დღეს ყველა მძულხართ, გუშინ მიყვარდით...
ვიყავი ბრიყვი, მერე რა მოხდა?
გადატრიალდა ჩემი ურემიც,
მაგრამ ამაოდ, გზა არ გამოჩნდა...
მშვიდობიანად მინდოდა წასვლა,
დუმილს ვარჩევდი, თქვენ გაართულეთ...
თუ გსურთ უღირსად მომიხსენიეთ,
ნება თქვენია, მე დავასრულე!