“Язэп Драздовіч” Ганны Салагуб

Значная падзея адбылася сёння ў мастацка-этнаграфічным музеі імя Я.Н.Драздовіча. Сваю дыпломную працу – бюст Язэпа Драздовіча “Чалавек, які глядзеў у неба” – перадала ў дар музею выпускніца мастацка-графічнага факультэта Віцебскага дзяржаўнага ўніверсітэта імя П.М.Машэрава Ганна Салагуб. Гэты твор – дыпломная праца Ганны Мікалаеўны, якая атрымала высокую ацэнку. Тэму яна выбрала невыпадкова. Калісьці дзяўчыну ўразіла карціна Язэпа Драздовіча “Сустрэча вясны на Сатурне”, якую яна ўбачыла ў Нацыянальным мастацкім музеі Рэспублікі Беларусь. Ужо студэнткай Ганна Салагуб зацікавілася творчасцю таленавітага мастака. Навуковы кіраўнік Сотнікаў Сяргей Мікалаевіч падтрымаў ідэю студэнткі і садзейнічаў яе ажыццяўленню.
Зараз Ганна Салагуб працуе кіраўніком гуртка дэкарытыўна-прыкладнога мастацтва і скульптуры “Затейники” філіяла “Тулаўскі сельскі дом культуры” ДУК “Віцебскі раённы цэнтр культуры і творчасці”
Супрацоўнікі музея вельмі ўдзячны маладому таленавітаму скульптару Ганне Мікалаеўне Салагуб. і жадаюць ёй новых творчых задумак і іх паспяховага здзяйснення. Упэўнены, што Ганну чакае шырокая дарога ў свеце мастацтва.