ТЫДЗЕНЬ БАЦЬКОЎСКАЙ ЛЮБОВІ

Учора ў музейнай гасцёўні “Аб сям’і, каханні і жыццёвай мудрасці” сустрэліся прадстаўнікі трох пакаленняў. Завіталі старшакласнікі Германавіцкай сярэдняй школы, бацькі і дзеці са шматдзетных сем’яў, вяскоўцы сярэдняга і старэйшага ўзросту. Кожны момант свята, прысвечанага Тыдню бацькоўскай любові, быў прасякнуты сардэчнасцю і душэўнасцю. Цікавай як для дарослых, так і для дзяцей стала размова аб узаемаадносінах у сям’і, аб сакрэтах сямейнага шчасця. Гучалі прыказкі і прымаўкі, падчас міні-квэсту дзеці і дарослыя тлумачылі прызначэнне прылад, якімі карысталіся нашы продкі.
Асаблівы каларыт святу надалі выступленні самадзейных артыстаў Васюкоўскага СДК і Пялікаўскага сельскага клуба. З гэтымі ўстановамі культуры музей супрацоўнічае ўжо даўно, а таленавітыя спевакі Ігар Жук, Вольга Яцына і Галіна Ермаловіч палюбіліся нашым гледачам. Яны не толькі сталі ўдзельнікамі ўрачыстай праграмы, але і выканалі песні па заяўках, пад якія з задавальненнем танцавалі нават госці старэйшага ўзросту
Свята ўдалося, падарыла ўсім добры настрой і пакінула самыя найлепшыя ўражанні!