...

ორი გარდაცვლილი ავადმყოფი, ორი ადამიანის ჭკნობაშეუპარებელი სიცოცხლის ხელყოფა ერთ თვეში და ეს მხოლოდ ექიმთა არაპროფესიონალიზმის და დაუდევრობის გამო.
მინდა გიამბოთ ამ ახალგაზრდების შესახებ:
ბექა თვალიშვილი დედისერთა... 32 წლის, დარჩა დედა, მეუღლე და 11 წლის ქალიშვლი.
გრიპის და ფილტვების ანთების დიაგნოზით, საკუთარი ფეხით მივიდა საავადმყოფოში. გადასხმების შემდეგ მოიკეთა, საჭმელიც კი მოითხოვა. მიმღებმა ექიმმა (ლეილა გაბელაია) სანდო მდგომარეობაში დატოვა.
რეანიმაციის ექიმმა მავრა ჩეკურიშვილმა, - როგორც პაციენტის დედა გვიამბობს, მოულოდნელად განაცხადა, რომ ცუდად იყო, თუმცა ბექა იმ წუთებში არანაირ ტკივილს აღარ უჩიოდა. მიუხედავად ამისა, ის მაინც შეიყვანეს ექიმის დაჟინებული მოთხოვნით რეანიმაციულ განყოფილებაში, სადაც 6 საათი დაჰყო ავადმყოფმა
და იქედან მომაკვდავი გამოიყვანეს... მდგომარეობადამძიმებული ავადმყოფი თბილისში გაწერეს. იქაც "მარჩიელობა" დაიწყეს. ხან თირკმლის უკმარისობა დაასახელეს, ხან - გულის, თუმცა ბექა არც ერთს უჩიოდა და არც - მეორეს.
22 თებერვალს ბექა გარდაიცვალა...
... ტრაგედია ამით არ დასრულებულა. სამწუხაროდ კიდევ ერთმა ოჯახმა ჩაიცვა ძაძები... ისევ იგივე ექიმის წყალობით, ისევ მავრა ჩეკურიშვილის "შემწეობით"...
გაზეთ "კვირის პალიტრაში" დაიბეჭდა ამ ტრაგედიის შესახებ. მინდა მცირეოდენი შემოკლებით შემოგთავაზოთ ეს სტატია:
ხუთ დღეში, სამი საავადმყოფოს გამოცვლის შემდეგ ახმეტაში მცხოვრები 25 წლის მამუკა სალთხუციშვილი თბილისში, კლინიკა "ლანცეტში" გარდაიცვალა... როგორც გარდაცვლილის ოჯახის წევრები აცხადებენ, პაციენტს ჯერ ახმეტის რაიონულ, შემდეგ კი თელავის რეფერალურ საავადმყოფოში საჭირო სამედიცინო კვლევა არ ჩაუტარდა, რამაც მისი გარდაცვალება გამოიწვია.
მამუკა სალთხუციშვილმა სასწრაფო სამედიცინო დახმარების ბრიგადა პირველად 12 მარტს გამოიძახა. ახლობლების თქმით, მას თავის ძლიერი ტკივილი აწუხებდა.
თუმცა, არც მაშინ დ არც მომდევნო ორი გამოძახების შემდეგ, სასწრაფო დახმარების ბრიგადამ ის საავადმყოფოში არ გადაიყვანა, რის შემდეგაც მამუკას ახლობლები იძულებული გახდნენ, ბიჭი ახმეტის რაიონულ საავადმყოფოში თავად მიეყვანათ...
მომდევნო გამოძახებისას უთქვამთ, - ამ ნომრიდან კიდევ რამდენჯერმე რომ დარეკოთ, იცოდეთ, ჯარიმის გადახდა მოგიწევთო. რადგან სხვა გზა არ ჰქონდათ, კაცი ტკივილისგან კვდებოდა, ახლობელ გოგონას, ნინო შათირიშვილს დედამისის სახელზე გამოუძახია სასწრაფო დახმარების ბრიგადა და მამუკასთან მიუყვანია. ისევ შენ ხარ, რა გინდა, რას გადაგვეკიდეო, - უთქვამთ და არც ამჯერად წაიყვანეს საავადმყოფოში. მათი წასვლის შემდეგ, მეგობრებმა წაიყვანეს ახმეტის რაიონულ საავადმყოფოში. თავის ტკივილებს უკვე გულის რევის შეგრძნება დაემატა. ამ სიმპტომების მიუხედავად, ტომოგრაფია მაინც არ გადაუღეს, გადასხმები გაუკეთეს, - ეტყობა, რაღაც ვირუსი შეხვდაო, თუმცა ტკივილი მაინც არ შეჩერდა.
მამუკას რომ უთქვამს, უფრო ცუდად ვარო, -ექიმს უპასუხია, - იტყუები, რადგან ისეთი გამაყუჩებელი გაგიკეთე, შეუძლებელია კიდევ გტკიოდესო..
თბილისში გადაყვანაზე დაიწყეს ლაპარაკი, რაზეც მათ უპასუხეს, - თავის ტკივილის გამო ჩვენ პაციენტს ვერსად წავიყვანთ, საკუთარი სურვილით, კი ბატონო, წაიყვანეთო... ვერ გარისკეს წაყვანა. ისევ მეგობრებმა გადაიყვანეს ახმეტის რაიონული საავადმყოფოდან თელავის რეფერალურში. ეს მოხდა 13 მარტს, დილის საათებში. შემდეგ გაიგეს, რომ როგორც ახმეტის რაიონულ, ასევე, თელავის რეფერალურ საავადმყოფოს ერთი და იგივე კომპანია "ევექსი" მართავს... იქაც გადასხმები გაუკეთებიათ.
მამუკას დეიდაშვილი:
" ვიცოდი, რომ წინა დღეს უკვე გაკეთებული ჰქონდათ გადასხმები და შედეგი ვერ მივიღეთ და როდესაც ექიმს შევხვდი, ქალბატონი იყო და ვთხოვე, -მითხარით, რა გვჭირს-მეთქი -ნუ პანიკობთ, საგანგაშო არაფერია, ტემპერატურაც კარგია და წნევაცო. ჩამომითვალეს, რაც გაუკეთეს და ბოლოს ტომოგრაფიაც მიხსენა, გადავუღეთ უკვე და საშიში არაფერია, ალბათ ვირუსულია, თქვენ თუ გინდათ, წაიყვანეთ თბილისში, მაგრამ საშიშს ვერაფერს ვხედავ, იქ რომ გადავიყვანოთ, რამე ხელჩასაჭიდი ხომ უნდა გვქონდესო... "
მამუკა მისმა მეორე დეიდაშვილმა მოიკითხა და როცა სიტუაცია აუხსნეს, უთქვამს, აქ ვირუსი ნაკლებ სავარაუდოა, უფრო "ანევრიზმასთან" გვაქვს საქმე და სასწრაფოდ თბილისში წამოიყვანეთო (პროფესიით ექიმია, დეიდაშვილი)
დილის 10 საათზე გამოიძახეს რეანომობილი და საღამოს 9 საათზე მოვიდა.
საკუთარი ტრანსპორტირებით გადაადგილების კი უკვე ახლობლებს შეეშინდათ, ვაითუ უარესად გავართულოთ საქმეო.
სოსო დავითაშვილი, კლინიკა "ლანცეტის" რეანიმაციული განყოფილების უფროსი:
-" ჩვენთან როცა შემოიყვანეს, პრაქტიკულად აზრი აღარ ჰქონდა ნეიროქირურგიულ ჩარევას. მთელი თავის ტვინი სავსე იყო სისხლით, ანევრიზმა ჰქონდა და სამბალიანი კომა. ეს არის ყველაზე მძიმე კომა. რამდენიმე დღიანი თავის ტკივილები ჰქონია ვიდრე საავადმყოფოს მიმართავდა... სავარაუდოდ, თანდაყოლილი ანევრიზმის გასკდომასთან უნდა გვქონდეს საქმე, მაგრამ დაზუსტებით არ ვიცი. ჩვენთან რა მდგომარეობაშიც შემოიყვანეს მე ეს შემიძლია გითხრათ. რამ გამოიწვია ინსულტი ან რა მკურნალობა ჩაუტარდა თელავსა და ახმეტაში, არ ვიცი.
აი, ასე შეეწირა ჯერ სასწრაფო დახმარების ბრიგადისა და შემდგომ ექიმის დაუდევრობასა, თუ არაპროფესიონალიზმს ორი ახალგაზრდა ბიჭის სიცოცხლე.
მამუკა ობოლი იყო, მამა და ძმა გახდა მისი ჭირისუფალი...
... საშინელებაა და ძალიან ძნელად შესაგუებელი, როცა სიმწრით გაზრდილს დაუდევრობა გამოგაცლის ხელიდან.
"ჰიპოკრატეს ფიცი" ადამიანთა ხსნის შესახებ, ამ დროებაში უმეცართა დიპლომებმა,თუ უგულოთა მიერ მოწყობილმა სასაკლაომ ჩაანაცვლა...
რამდენჯერ უნდა აღმოვჩნდეთ "თევზის პოზაში", რამდენჯერ უნდა ჩავიგუბოთ პირში წყალი?
და რამდენჯერ უნდა იზეიმოს უმოქმედობით, პასუხგაუცემლობით უსამართლობამ?!
როდემდე?!
"ჩვენი ნება წმინდა კედელია ადამიანსა და უფალს შორის აღმართული" (ამბა პიმენი).
ბექა მამუკა