Թխվածք «Թռչնի կաթ»

Խմորը պատրաստել գոլորշու վրա-100 գր կարագին ավելացնել 1 բաժակ շաքարավազ, 4 ճաշի գդալ կաթ, 3 ճաշի գդալ մեղր, լավ խառնել, ավելացնել 2 ձու, 1,5 թեյի գդալ սոդա, 1,5 ճաշի գդալ քացախ, նորից խառնել, վերցնել գոլորշու վրայից, ավելացնել 1 տուփ վանիլ, 3 բաժակ ալյուր, խառնել, ստացվում է թույլ, կպչուն խմոր: Խմորից պետք է թխել 4 շերտ: Ջեռոցի քառակուսի տապակի վրա ալյուր ցանել, աչքաչափով վերցնել 1 մաս խմոր, գդալով տարածել տապակի մեջ, հավասարեցնել, թխել: Հանել ջեռոցից, թողնել սառի: Նույն կերպ թխել նաև մյուս 3 շերտերը: Ապա շերտերն իրար միացնել կրեմով, իսկ վերին շերտի վրա տարածել գլազուր: Պատրաստի թխվածքը թողնել մնա գիշերը՝ սենյակային ջերմաստիճանի պայմաններում, որպեսզի փափկի, ապա կտրատել փախլավաձև: Կրեմ-1 բաժակ շաքարավազին ավելացնել 3 ճաշի գդալ ալյուր, խառնել, ավելացնել կես լիտր կաթ, միջին ուժգնության կրակի վրա, անընդհատ խառնելով, եփել՝ մինչև պնդանա: Վերցնել գազի վրայից, թողնել սառի, ընթացքում մեկ-մեկ խառնել: 250 գր փափկացրած կարագն էլեկտրական հարիչով հարել այնքան՝ մինչև սպիտակի, քիչ-քիչ ավելացնել եփած զանգվածը, նորից հարել, ավելացնել 1 տուփ վանիլ: Գլազուր-5 ճաշի գդալ շաքարավազին ավելացնել 3 ճաշի գդալ կակաոյի փոշի, 6 ճաշի գդալ կաթ, ցածր ուժգնութան կրակի վրա, անընդհատ խառնելով, եփել: Երբ շաքարավազը հալվի, ավելացնել 70 գր կարագ, մի քանի րոպե եփել, վերցնել գազի վրայից, տաք վիճակում տարածել թխվածքի վրա: