Оҕо-аймах мустар Киинэ 55 сааһын туолла

З.А.Тихонова аатынан "Туелбэ" оҕо киинэ айымньылаах үлэтин Нам улууһун дьонугар-сэргэтигэр анаан, 55 сылбытыгар сөп түбэһиннэрэн, күүстээхтик бэлэмнэнэн бу сыл бүтүөн иннинэ ахсынньы ый 10 күнүгэр бэлиэтээтибит. Ол курдук сарсыардаттан кэлбит ыалдьыттарга, выпускниктарбытыгар педагогтар маастар-кылаастара, экскурсия тэрилиннилэр. Педагогтар методическай үлэлэринэн быыстапка, баай опыттаах педагог, норуот маастара М.П. Сыромятникова иискэ үлэлэрэ араас таһымнаах быыстапкаларга, фестивалларга кыттыбытын туоһулуур каталогтарын быыстапката ыалдьыттар болҕомтолорун тартылар. "Туелбэ" дьиэтигэр, уруккута Пионердар дьиэлэригэр дьарыктаммыт выпускниктарбыт оҕо саастарыгар төннөн сылаас иэйиинэн куустаран ыллылар.
Сүрүн бырааһынньыктааҕы тэрээһиммит Нам с. М.К.Аммосов аатынан культура уонна духуобунай сайдыы Дыбарыаһыгар "Түмсүүлээх үлэ үрдэллэрэ" уонна "Оҕо саас кустуга" диэн түһүмэхтэринэн өрө көтөҕүллүүлээхтик тэрилиннэ. Бастакы түһүмэххэ дириэктэрбит Н.Г.Дьячковская туох ситиһиллибитин, оҥоһуллуохтааҕын билиһиннэрдэ. Ол кэннэ үрдүк сыанаҕа выпускниктарбыт - СӨ норуодунай артыыһа Александр Емельянов, "Саха" НКИХ биллиилээх суруналыыһа Георгий Белоусов, киинэ режиссера Александр Лукин, Г.Кривошапко аатынан СӨ государственнай филармониятын солиһа Петр Попов, Анна Заровняева, Кэбээйи улууһун Сииттэ оскуолатын директора Андрей Новгородов, культура үлэһитэ Надежда Гуляева уо.д.а. тахсан үөрэппит педагогтарын ахтан-санаан махтал тылларын анаатылар, музыкальнай эҕэрдэлэрин тириэртилэр. Итилэри сэргэ Москва куораттан продюссер, режиссер, улахан шоу программалар тэрийээччилэрэ Эдик Гаврильев, Новай Зеландияттан моушн-дизайнер, Bunker студия арт.директора Александр Охлопков видеонан эҕэрдэлээтилэр.
Үөрүүбүтүн үллэстэ кэлбит улуус оскуолаларын директордара, тэрилтэ салайааччылара, социальнай партнердарбыт эҕэрдэлэрин тириэртилэр. Коллегаларбыт Таатта улууһуттан "Сатабыл" оҕо сайдар Киинин коллектива видеонан эҕэрдэтэ көһүннэ, Горнай улууһуттан Л.Е.Лукина аатынан Оҕо киинин эҕэрдэтэ ааҕылынна.
Иккис "Оҕо саас кустуга" түһүмэххэ "Туелбэ" бүгүҥҥү үлэтэ арыллан көһүннэ. Нам улууһун Ытык Киһитэ Ефросинья Соколова айан хаалларбыт "Тураҕас кугас аттаах Тойон Дьулустаан бухатыыр" олоҥхотуттан быһа тардыы көрдөрүлүннэ.
Ону таһынан араас кэмҥэ "Туелбэ" оҕо Киинигэр үлэлии сылдьыбыт педагогтар: Р.Татаринова уонна А.Баишева туруорбут үҥкүүлэрэ киэргэттилэр. Тэрээһиммитин өрө көтөҕүллүүлээхтик салайан ыыттылар киэн туттар выпускниктарбыт Е. В.Соколова "Дьырылыатта" куруһуогар дьарыктаммыт Надежда Дмитриева уонна Андрей Новгородов.
Өссө төгүл өрөгөйдөөх үбүлүөйбүтүнэн истиҥ эҕэрдэ, үүнэ, сайда туруоххайын, үлэ-хамнас аартыга алгыстаах буолуохтун!
А.С.Павлова, педагог-тэрийээччи.