"Марий Эл" газет - поро йолташет

Йошкар-Оласе Келшымаш пӧртыштӧ «Пагытын семже-влак. Шочмо мланде» лӱман ончер Россий Федерацийын сулло сӱетче, Марий Эл Республикын калык художникше, Иван Михайлович Ямбердовын шочмыжлан 70 ий теме лӱмеш пӧлеклалтын. М.Скобелевын фото ден видеожо.

Тыланет, салтак! Елена Эшкинина 👆 «Пидына меж пижергым – ит кылме, эргым…» Специальный военный операцийыш Марий Эл гыч чӱчкыдынак гуманитар полышым колтат.

Таче Йошкар-Олаште лӱмлӧ марий йылмызе, филологий наука кандидат Саваткова Анна Андреевналан тудын илыме пӧртыштӧ шарнымаш оҥам почмо. М.Скобелевын фото ден видеожо

🚗 Автомашинам виктараш ӱдыр, ўдырамаш-влак молан кумылаҥыт? Вера ГОРОХОВА, МЭТР телеканалын корреспондентше: – Ялыште илем, олаште пашам ыштем. Тиде амал денак водительлан тунемаш каенам, вет чыла вере шукташ шке транспорт кӱлын. Пашаште тунамсе вуйлатышем «Тый кертат! Тый моштет! Автомашинам виктараш тунемаш кайышаш улат!» манмыже кугу шўкалтыш лийын. Ешыштат чылан ўшаненыт. Икымше ганак экзаменым сайын кученам. Ынде латкум ий кажне эр-кас, кунамже каныш кечынат Йошкар-Олашке пашаш, районлаш концертым але пайремым вўдаш шке кудалыштам. Чылт москвичкыла илем, нуно метро дене пашаш 30-40 минут кудалыт, а мый район гыч тиде жапымак олаш толам. Шоналтем, да оҥайынат чучеш. 2021 ийыште «Автоледи» конкурсышкат ушненам ыле. Сеҥышыш лектын омыл гынат, шуко улан тунемынам. 📸 Фотом еш альбом гыч налме

Кечышот ден калык пале Йӱла Ожно тӱмыр марий йӱлам шуктымо семӱзгар гына лийын. Тудым перкалыме гоч тукым иквереш погынен, моло йӱламат пырля шуктеныт. Таче ты семӱзгарым ансамбль-влак кучылтыт, тыгак сӱан, моло пайрем годым перкалат. Марий тӱмырым тӱҥ шотышто гармонь, баян, шӱвыр шоктымо годым кырат. Тыге чумыр сем икшырымынрак лектеш, кушташат куштылгырак, маныт. Тӱмырым ончыч тичмаш писте але шопке сорым гыч лоден ыштеныт, кызыт фанерымат кучылтыт. Цилиндр форман ӱзгарым кок велым пеш вичкыжын ийлыме пий але презе коваште дене шупшын шындат. Тӱмырым кок могырымат перкалаш лиеш. Паҥгажым тумо але ваштар укш гыч ыштат. Тӱмыр нерген шымлызе-влакын тыге возымышт шинчаш логале: мариян ӱдырамаш ден ватан пӧръеҥын йышт вашлиймыштым шекланымеке, кидыштым кылден, нунын ӱмбакышт тошто вургемым сакаленыт да урем мучко тӱмырым кырыме йӱк дене намыслен коштыктеныт. Снимкыште: таче тӱмырым ӱдырамаш-шамычат сайын кырен моштат. Светлана Носован фотожо. https://газетамарийэл.рф/kechyshot-den-kalyk-pale-47/

«Боевой наградым пижыктен, Ошкылза урем ден кугешнен!» 👆 Марий Эл гыч землякнам, «Запад» войска-влак группировкын 288-ше гвардейский артиллерий бригадын командирже полковник Артём Кугергиным шукерте огыл «Россия 1» телеканалын «Вечер с Владимиром Соловьёвым» программыштыже ужна. 👆

Нине муро-шамычым Финн-угор калык-влакын «JulaВий» I бард муро фестивальыштын лауреатше Геннадий ЛЕБЕДЕВ мура. Волжский районысо Нурмучаш Шайра ялыште илыше тиде артист тыгак - боевой действийын ветеранже, тале спортсмен, йӧратыше пелаш, сай ача, ӱшанле йолташ. Геннадий Лебедев дене лишкырак «Марий Эл» газетын шушаш номерыштыже палдараш шонена. М.ИВАНОВАН видеожо.

🎼🎤 11 декабрьыште М.Шкетан лӱмеш Марий национальный драме театрын сценыштыже калыкнан лӱмлӧ да талантан шочшышт-влак Татьяна Денисован, Вениамин Захаровын да Альбертина Иванован лӱмгечыштлан пӧлеклалтше усталык кас лиеш. 🖇 Билетым театрын кассыштыже але тыгай телефон номер дене йыҥгыртен, йодаш лиеш: 7902 465 7427 ❤ Айста чылан погынен, концертыш миена! Вашлиймешке!

🎭 🎼 4 декабрьыште М.Шкетан лӱмеш Марий национальный драме театрыште актрисе Наталия Алексееван «Таче кечын улам пиалан» концертше лиеш. Наташа нерген КУМДАНРАК 28 ноябрьыште лекше "Марий Эл" газетыште лудаш темлена. 📸Фотом еш альбомжо да театрын архивше гыч налме

Чолга еҥ чыла вере чолга Шернур район Изи Торешкӱвар ялын старостыжо Владислав Смородинов кумло кок ий ялвуй сомылым шукта. Шочмо кундемже шергырак лийын 1994 ийыште, старостым икымше гана сайлаш тӱҥалме годым, Владислав Васильевичлан тиде пашам ӱшаненыт, да кызыт мартеат ты сомыл деч кораҥын огыл. Самырыкше годым водительлан тунем лектын, «Дружба» колхозышто шоферлан, вара пырчым эрыктен коштымо комплексыште машинистлан тыршен. Ик ганат ӧрдыж кундемыш илаш куснаш шонымашыже лийын огыл. Шочмо ялже ончыкылыкдымо радамыш логалын, да тыште илыше-влаклан эсогыл у пӧртым чоҥаш чареныт. А кугу тӱня дене Лаж эҥер гоч пу кӱвар гына ушен, машина дене водитель-влак лӱдын-лӱдын вонченыт. Ий еда гаяк тысе пӧръеҥ-влак тудым ачален толашеныт. Шуко гана тыште чапле кӱварым ышташ кӱлмӧ йодышым тӱрлӧ кӱкшытыштӧ нӧлталыныт. Тыге вич ий ончыч шонымышт шукталтын: кӱртньӧ-бетон чапле кӱварым ыштен шынденыт. – Кӱварым ыштыме дене Кужэҥер районысо ялла гычат Шернурыш кудалышташ тӱҥалыныт, – ойла Владислав Васильевич. – Вет тышечын райрӱдыш тора огыл. Ме тиде ялыш Кугэҥер ял администрацийым вуйлатыше Надежда Борисова дене пырля мийышна. – Смородиновым ик эн чолга старостылан шотлена. Пашам ышташ тӱҥалмем годым коклаштына умылыдымашат лектын. Ынде сӱрет йӧршеш весе. Вет шке ял верч чон йӱлен тыршыше еҥын йодмашыжат кугурак. Шке пашажым сайын пала, мемнан дечат йодын мошта. Кунам верысе кучем ден калык коклаште сай кыл уло, сай лектышым веле вучо, – ойла Надежда Валерьевна. Снимкыште: старосто Владислав Смородинов илыме пӧрт ончылныжо. Вячеслав Смоленцевын фотожо.