Мағрур эдим, мағрур девона,

Таъзим қилди шу мағрур одам!
Мен севаман, деганим ёлғон,
Мен севмайман, деганларим ҳам!
Юрагимни тушунмайсан сен,
Юрагимдан мени кўнглим тўқ!
Энди сенга қайтолмайман мен,
Лекин сендан кетганим ҳам йўқ!
Ёдимдасан сен ҳали, ҳамон,
Ёдимдасан ёниқ қолган шам!
Мен унутдим, деганим ёлғон,
Мен эслайман, деганларим ҳам!
Тополмадим дунёда паноҳ,
Унутганман дилнинг отини.
Бугун тонгда уйғониб, эвоҳ,
Йиғлаб айтдим севги ёдини!
Юрагимни куйдирар ҳамон,
Юрагимда ўчмай қолган шам:
Мен севаман, деганим ёлғон,
Мен севмайман, деганларим ҳам!