​​Йигитлар йиғланг

ҳикоя
Она тили ўқитувчиси бир қизга совчи қўймоқчи бўлди.
Қизнинг отасига:
«Ҳурматли амакижон, каримангизнинг қўлларини сўраш биз учун шараф. Агар бизга ваъда берсангиз, биз хурсанд бўлар эдик. Сиз рози бўлсангиз, бизни таклиф қилинг! Маҳр масаласини, бошқа тафсилотларни келишамиз. Яхшиликни тезлаштирган яхши. Биз яхшиликни умид қиламиз» деб ёзди.
Ота унга жавобан:
«Азиз ўғлим, биз учун бу шараф. Сизни тарбиялаган ота - онангиз, олган билимингиз бунчалар яхши. Илмли, билимли эканлигингиз жуда катта нарса.
Энди - и - и азиз ўғлим, маҳр масаласига келсак, униси бунисини қўйинг.
Аслини қарасангиз биз, бир жонни сотиб оляпмиз ҳисоб. Нима бўлганда ҳам ҳар қанча пул, мол - мулкнинг бир инсончалик қадри - қиймати йўқ.
Лекин... урф деган нарсалар ҳам борки, уларни унутмаслик керак. Зеро шу урф, сиз -у бизни қора кунларда ҳимоя қилади.
Мақсадга ўтсам, ожизамиз учун бизга олдиндан юз минг берсангиз, сўнг қирқини берарсиз.
Банкга эҳтимолга қарши қизимизнинг номига эллик ўтказсангиз...
Кийим - кечак, сеп деганларидек...., уларнинг энг яхшисидан қилсангиз... Тўй тантанасини ўтказиш учун «Шератон» менимча энг мақбул жой, бизга шуниси ҳам етади, бўлаверади.
Агар шуларга рози бўлсангиз... Аллоҳ сизга ҳам бизга ҳам баракасини берсин, деб дуога қўл очамиз» деди.
Йигит унга жавобан:
«Ҳурматли амакижон, маслаҳатим, каримангизни ачитиб - бижитиб олиб ўтиринг! Уйингизнинг токчасига зайтун мойидек қўйиб қўйинг! Агар сиз айтган маҳрнинг тўртдан бири менда бўлганда, бугуннинг Қоруни бўлардим» деди
Ажабо, бунга қандай хулоса ясаш мумкин?! 🤔
Йигитлар енгил маҳр бериб уйланиб пастга урсалар, кўп маҳр сўралса «ОСМОНДАГИ ОЙМИДИ» десалар...
Ўзлари эса келин томон қилган сарполарни кийиб кеккайиб юрсалар...
Қайноталари қилган краватда ётсалар...
Фарзандли бўлганларида эса ёмон кўрадиган қайноналари чақалоқ 5-6 ёшга тўлгунча киядиган бошдан оёқ сарпо-суруғ қилсалар...
Яна бу йигитлар «Эркакман» деб кўксиларига урсалар...
Ҳой «Эркак» ! Эркак бўлсанг охиригача эркак бўл дегинг келади...
(Шу ўринда ўзини ҳақиқий эр санаб, уйланаётганда келиннинг барча сарпо-суруғини, каму кўстини ўзи олиб, ўз вазифасини ўрнида адо этаётган Йигитларимизга офарин деймиз! Аллоҳ бирингизга мингни қўшсин, Ўзи сиздан рози бўлсин деймиз! Сиздек чин Эркаклар сафи кўпайсин!)