თხოვდება მწვანე ბაყაყი, ცოლად მიჰყვება ხვლიკს.

ეჩხუბებიან მშობლები – მაგას ვის მისდევ, ვის?
ეგ შენ არ შეგეფერება, ნუ დაიღუპავ თავს!
რამდენი დადის უცოლო, საქმროს გინახავთ სხვას.
აგერ, მეზობლის გომბეშო, დედისერთაა თან.
სულ თათისგულზე გატარებს, შენ განაცვალებს თავს.
ალბათ, ხერხი თუ იხმარა, ალბათ, მიმართა ხრიკს...
მაგ მოუსვენარს, გალეულს, როგორ მიჰყვები ხვლიკს?!
ბაყაყი ყურსაც არ უგდებს, მწვანედ იღებავს თმას.
– ვინც მიყვარს, იმას მივყვები, სხვამ რაც არ უნდა თქვას!