Salam əziz dostlar hər vaxtınız xeyirli olsun.

Bu şəkili internetdə gördüm ürəyim sızladı. Övladını sevən və onların xoş gələcəyi üçün bütün əzablara qatlanan atalara ömrümü qurban verərəm. Bu şəkilə baxa-baxa könlümdən keçənləri yazdım.
ATALAR
Dünyanın dərdini alıb çiyninə,
Sevinə-sevinə çəkdi Atalar.
Zamanı çatanda qara bulud tək,
Nadanlar başına çökdü Atalar.
Halal qismətiylə, şirin dadıyla,
Yad oldu həmişə elin yadıyla,
Mərdliklə, zəhmətlə, təmiz adıyla
Hər kəntdə bir saray tikdi Atalar.
Uşaqlar uzaqdan gələndə öyə
Sevinci sığmadı yerə, nə göyə,
Övladı dağ qədər ucalsın deyə
Bükülməz belini bükdü Atalar.
Tamahdan uzaqdı, nəfsdən toxdu,
Hər kəskin baxışı düşmənə oxdu,
Oxşada bilməzsən, bənzəri yoxdu,
Yerin tanrısıdı, təkdi Atalar.
Qorxmadı acıdan, ağrı, azardan,
Nə gördü, təzəsin aldı bazardan,
Bəd günə sevinən mərdiməzardan
Üz üzə gəlmədi, səkdi Atalar.
Elşən, ocağının alovu sönməz,
Beli bükülsə də, qolu bükülməz,
Zəmisi, sünbülü, dəni tükənməz
İnsanlıq toxumu əkdi Atalar.
Elşən Eloğlu 22.02.2017