PUL

Heç zaman əl çirki deməyin pula,
İndi çox dərdlərə dərmandı o pul.
Zalıma məlhəmdi, səbəbi düşür,
Məzlumun boynunda fərmandı o pul.
Qanunu yazan da, pozan da odur,
Düz yola qayıdan, azan da odur,
Çoxuna quyunu qazan da odur,
Bəzən də yollarda dumandı o pul.
Qismətin yoxdusa axtarma lələ,
Tanrı bəxş etməyib deməli hələ,
Kiminə bir ömür ağır bir şələ,
Kiminə dəryadı, ümmandı o pul.
Kimini sərçətək atar anbara,
Kimini zülm ilə çəkir o dara,
Kiminin üzünü quru divara,
Çevirib zülm edən dovrandı o pul.
Ədalət, bəllidir sənin niyyətin,
Fələklə nərd atmaq çətindi , çətin,
Öyrənmək istəsən son aqibətin,
Qaranlıq zülmətdi, zindandı o pul.