GƏLİB

Neynirsən Məkkəni, neynirsən Hacı,
Əməlin qoy olsun başının tacı.
Doyur yüz yetimi, doyur yüz acı,
Desinlər Məkkədən bir insan gəlib.
Şərt deyil gedəsən o uzaq yolu,
Çoxdu şəriətin haçalı qolu.
Qoyma sızıldaya bir Allah qulu,
Desinlər Məkkədən bir insan gəlib.
Budur Peyğəmbərin buyruğu bizə,
Könüllər gəl oxşa, süfrələr bəzə.
Qıyma göz yaşları dönə dənizə,
Desinlər Məkkədən bir insan gəlib.
Səxavət ağacdır, ibadət barı,
Həmişə uca tut ixtiyarları.
Qovuşdur ürəkdən sevən cüt yarı,
Desinlər Məkkədən bir insan gəlib.
Arının iynəsi bəslənər balda,
Bülbül güldə yatar, qarağalar kolda.
Səcdə et atalar iz qoyan yolda,
Desinlər Məkkədən bir insan gəlib.
Bir əlimdə Quran, birində çörək,
Dinlə Ədaləti nə deyir görək.
Xəstəyə məlhəm ol, qəlbsizə ürək,
Desinlər Məkkədən bir insan gəlib.