Фикрет Хидиров

ХАЙИ ЧIАЛ ХУЬЗ СЕКИНДИЗ
Захъ рахадай, захъ кхьидай чIал ава,
ЧIалан танда зав агакьай гьал ава.
Заз чида зи чIалан дувул дерин я,
Вучда, чIала гьуьжет алай къал ава!
Заз чида, къе парабрув гва къелемар,
Алахъзава чи чIал ийиз бегьемар.
Садбур ава гьетрен-петрен чIал кхьиз,
КIелдамазни рикIе жезва зегьемар.
Заз чида, яд сафуна хуьз жедай туш,
Заз чида, нек хамунай куьз жедай туш.
Жеда, лугьуз дам къалузва субутиз,
Алахъзава зи хайи чIал кубутиз.
Заз чида: чи чIалан низам векъида,
Низамдикай хкатай чIал рекъида.
Заз чиз ава куфунзузри, хаинри,
Къадир течиз, такIан яз, чIал рекьида.
Уьмуьр фида чIал галайнихъ йигиндиз,
Гьуьжетравай чIал амукьда четиндиз.
Ябни гудач за «меслятриз» квак галай,
Фикрет жеда хайи чIал хуьз, секиндиз!
2016