КЦ1АР КЪЕ ЗАЗ ХУШ АКУНА

Кц1ар – ватан зи чан, зи рик1,
Хтанва зун, хьанваз гъарик1.
Ваз мугьман я, лугьун за гьик1.
Хабар кьурт1а дустари ик1:
- Кц1ара ваз вуш акуна?
- Кц1ар къе заз хуш акуна.


Дуьз я, хъфин хьанва четин,
Тушт1ан яргъал мензил рекьин,
Часпардини, алай кьве чин,
Къалурзава «гьунар» вичин.
Заз адав гвай «кьуш» акуна.
Амма Кц1ар хуш акуна.


Иер хьанва к1алуб адан,-
Акваз куьче, акваз майдан,
Аямдинди я к1валер кьакьан,
Ц1урувални амач накьан.
Гьич кьве йис кьван туш такуна,
Кц1ар къе заз хуш акуна.


«Пачагьдин багъ» - я халис т1вар,
Тарар, ина, ама пайгар.
К1вачик хьайи хъипреп1 к1усар,
Къван туна мармардиз ухшар,
Чиле гишир-аруш акуна.
Кц1ар къе заз хуш акуна.


Зун фена «Беневша» вирел,
Адал ала сетка – регъел…
Патав, ц1ийи багъда гуьзел,
Ацукьнавай гъилер къуьнел,
Заз гадани руш акуна.
Кц1ар къе заз хуш акуна.


«Къайи булах», женнет я лагь!
Аниз тефин вич я гунагь.
Имаратар, машаллагь,
Эцигнава пагь – пагь – пагь!
Мугьманрин алт1уш акуна.
Кц1ар къе заз хуш акуна.


Хъсан хьанва шегьердин гьал,
Амма рик1и ч1угуна т1ал:
Лайих гафар дидед ч1алал,
Акунач алай я цал, я к1вал…
Татугайвилин т1уш акуна,
Ят1ани Кц1ар хуш акуна.

2011 й.

«Пачагьдин багъ» - гилан Н.Нариманован т1варцихъ
галай парк