Eyfel minorasining 125 yilligi nishonlanmoqda

Bugun Eyfel minorasi qurib bitkazilganiga 125 yil to‘ldi. Bu haqda “ITAR-TASS” xabar berdi.
Eyfel minorasi (la tour Eiffel) Parijda 1889-yilning Butunjahon ko‘rgazmasiga to‘g‘rilab bitkazilgan. 1889-yilning 31-martida minoraning tantanali ochilishi bo‘lib o‘tgan. O‘sha yilning 15-mayida esa unga ilk tashrifchilar ko‘tarilgan.
Qurilish 26 oy davom etgan. Minoraga uni yaratgan konstruktor Gyustav Eyfel nomi berilgan.
300 metrli minora o‘sha paytdagi eng baland binolarni deyarli ikki barobar ortda qoldirar edi. Bu rekordni u 1931-yilgacha ushlab turdi.
Minoraning panjarasimon qurilmalari 18 mingta bo‘lakdan iborat. Ularni bir-biriga ulash uchun 2,5 millionta mixparchin ishlatilgan.
Eyfel minorasini yaxshi holatda saqlash va zangdan himoya qilish uchun har yetti yilda 57 tonna bo‘yoq ishlatiladi.
Minoraning birinchi va ikkinchi qavatlarida restoranlar, uchinchi qavatida tomosha maydoni joylashgan. Bir vaqtning o‘zida minoraga 10,4 ming kishi chiqib turishi mumkin.
Eyfel minorasi dunyoda eng ko‘p tashrif buyuriladigan sayyohlik obyektlaridan biridir. Qurilganidan buyon u yerga 250 milliondan oshiq kishi tashrif buyurgan.
Minora Parij mulki hisoblanib, Eyfel minorasidan foydalanish jamiyati tomonidan boshqariladi.
2012-yilda bino 435 milliard yevroga baholangan va Yevropadagi eng qimmat inshoot deb e’lon qilingan.