ილია II-ს დაწერილი შენდობის ლოცვა.

„სრულიად საქართველოს აღსარება“ (გვთხოვა ვიკითხოთ საქართველოსთვის)
"დაუსაბამოო და დაუსრულებელო, უხილავო და მიუწვდომელო, უძლეველო და მოწყალეო, სიყვარულო და სასოებაო ჩვენო, წმიდაო უფალო საბაოთ, შემოქმედო ცათა და ქვეყანისაო, დიდება შენდა ძეო ღვთისაო, უფალო იესო ქრისტე, თანაარსო და თანასწორო მამისაო, სიტყვაო მამისაგან მხოლოდ შობილო, ჩვენთვის განკაცებულო, ჯვარცმულო, მკვდრეთით აღმდგარო და ამაღლებულო მეორეს მოსვლისას წყალობით განმკითხველო და შემწყნარებელო მონანულეთაო, დიდება შენდა, სულო წმინდაო, უფალო მამისაგან, რომელი ყოველგან ხარ და ყოველსავე აღავსებ მადლითა შენითა, უძლურთა მკურნალო და ნაკლულევანთა აღმავსებელო, დიდება შენდა. ყოვლადწმინდაო ერსა ჩვენსა პირველი და უმძიმესი ცოდვა ადამისა ამპარტავნება. ქედმაღალნი ვიყავით და ვართ, ვითარცა ცარიელნი და თავთავნი პურისანი და მარად ვივიწყებთ სწავლებასა ბრძენისა სოლომონისა: „ამპარტავანთა შემუსრავს ღმერთი, ხოლო მდაბალთა მისცეს მადლი. დაღუპვას წინ უსწრებს ამპარტავნება, დაცემას ქედმაღლობა“. უფალო განგვკურნე ჩვენ ამ სენისაგან და შეგვიწყალენ ჩვენ. უფალო შეგვინდე და გვაპატიე შენგან განდგომა და ურწმუნოება, ტაძრებისა და მონასტრების ნგრევა, ეკლესიის შეურაცხყოფა, მართლმადიდებელი სარწმუნოების უარყოფა, შეგვინდე უფალო სასულიერო პირთა და ბერ-მონაზონთა დევნა და დამცირება. გვაპატიე უფალო სამშობლოს ღალატი და ორგულობა, კაცთ კვლა, ძმათა სისხლისღვრა, დედათა მიერ ჩვილთა მუცლად მოწყვეტა. დიდად გცოდეთ უფალო მრუშობით, შეურაცხყოფითა და გულგრილობით და დავივიწყეთ გაფრთხილება ესე შენი: „წყეულიმც იყოს დედ-მამის შემაგინებელი“. როგორც ბრძანებს მეფე სოლომონი. ვცოდეთ უფროსების დამცირებით, განკითხვით, გარდაცვლილთა ულოცველობით, მათთა ნაშრომთა და ნაღვაწთა დაუცველობით და დაუფასებლობით. ვცოდეთ არაწმინდა ფიქრით, ცილისწამებით, შურით, მეგობართა მიმართ ღალატით, შფოთით, მრისხანებით, შურისძიებით, სხვისი ქონების მიტაცებით, სიხარბით, ქურდობით, ძალადობით, სიმდიდრის სიყვარულით და მათზე იმედის დამყარებით. შეგვინდე და გვაპატიე უფალო, ლოთობა, ნარკომანია, მტრობა, ღვარძლი, სხვისი ნაკლისა და ცოდვების განკითხვა, ეგოიზმი, გემოთმოყვარეობა, პატივმოყვარეობა, ქონების და ფულის უაზროდ ფლანგვა, მომხვეჭელობა, გაჭირვებულთ დაუხმარებლობა, პირადი განდიდების სურვილი. ღმერთო მოწყალეო, ვცოდეთ უსაქმურობით, დაზარებით, აღსარებისა და ზიარების გარეშე ცხოვრებით, მკითხავთა დაჯერებით, ოთხშაბათ-პარასკევსა და სხვათა მარხვათა დარღვევით, შაბათ-კვირას და დღესასწაულებზე დაუსწრებლობით, თვითმკვლელობაზე ფიქრით, შვილების, ახლობლებისა და სხვა ადამიანების წყევლით, ჭეშმარიტი რწმენისა და სულიერების გარეშე აღზრდით, არაეკლესიური, ამაო ცხოვრებით და მრავალი სხვა ცოდვით. ჰოი, უფალო, მუხლმოდრეკილნი გევედრებით ჩვენთა წინაპართა, სრულიად საქართველოსა და ყოველთა ქართველთა სახელით, მკვიდრთა საქართველოისათა და სამშობლოს საზღვრებს გარეთ მყოფთა ჩვენთა თანამემამულეთა სახელით და შეგთხოვთ, მოიხილე ჩვენზედა დიდებითა, წყალობითა შენითა და მრავალთა მოწყალებითა შენითა, აღხოცენ უსჯულოებანი და ცოდვანნი ჩვენნი, გვასხურე ჩვენ უსუპითა და განვსპეტაკნეთ. შეახე ყოვლადწმიდა ხელი შენი სულსა და ხორცსა, გულსა და გონებასა ჩვენსა და განგვწმინდენ ჩვენ. მწყემსო კეთილო, რომელმან გვზარდე და გვრწვთნე წელნი ათასეულნი და მრავალთა განსაცდელთაგან საკვირველად გვიხსენ, აწცა მოგვხედე მოწყალებითა. შეჭირვებულნი გევედრებით აღადგინე და განამტკიცე საზღვარნი საქართველოსანი, დალოცე მამული ჩვენი და ყოველნი მკვიდრნი მიწისა ამის. მტერნი და მებრძოლნი ჩვენნი მოყვარედ მოაქციე. მოგვეც მოწყალეო შეორგულებული სიყვარული ღვთისა და მოყვასისა, მშვიდობა და სიბრძნე, თავმდაბლობა, სიხარული, გული გონიერი, უნარი ცოდვათა მიტევების, უნარი კეთილისა და ბოროტის გარჩევისა. შთაგვაცვი სამოსელი სპეტაკი ნათლისღებისა და შეგვაერთე სიყვარულითა რათა ვიყოთ ერთი სამწყსო და შენ იყო მწყემსი ჩვენი კეთილი. ცოდვათა ჩვენთა ზღვა აღძრულ არს და დანთქმასა გვიქადის, მაგრამ შენზედა მონდობილნი, უფალო, ვსასოებთ, რათა აღსრულდეს ნათქვამი შენი: „მეწამულიც რომ იყოს თქვენი ცოდვები, თოვლივით განვასპეტაკო, ჭიაფერივით წითელიც რომ იყოს, მატყლის ფთილასავით ვაქციო. ნისლივით წარვხოცავ უსჯულოებათა შენთა და ღრუბელივით ცოდვათა შენთა. დამიბრუნდი, რადგან მე გამოგისყიდი შენ“. უფალო ჩვენო! ისმინე და შეიწირე აღსარებაი ჩვენი მეოხებითა ყოვლადწმიდისა დედისა ჩვენისა ღვთისმშობელისა და ყოველთა წინაპართა შენთათა გვაცხოვნენ ჩვენ სახელისა მამისათა და ძისათა და სულისა წმიდისათა, ამინ!"
უწმინდესი და უნეტარესი, სრულიად საქართველოს კათოლიკოს პატრიარქი ილია II