Юрагимга нима дейман сен кетгач, сўнг,

Топиб бер деб ҳаловатдан қилса жудо.
Нима дейман, ҳаёлларим пароканда,
Сониялик висолинга бўлса фидо!
Менга эмас мухаббатга ачингин сен,
Сен кетгач сўнг унга қандай кет деб айтай.
Қасамлардан осонгина қайтарсану,
Мен ишқимнинг ватанидан қайга қайтай?
Ишон, менинг сендан ўзга борар ерим,
Сендан ўзга ўлсам кўзим ёпарим йўқ.
Ошиқман деб аюҳаннос солган кўпу,
Кетиб қолсам дод деб изим ўпарим йўқ!
Юрагимга нима дейман кетиб қолсанг,
Томирларда тошдек қотиб қолса қоним.
Гурзиларга қандай бардош берсин айтгин,
Ишқинг омон сақлаб турган чивин жоним!
Кетиб қолсанг Осмон қулар гарданимга,
Юрарга йўл, кирарга гўр тополмасман.
Нима қилай қирқ йилда ҳам сен келмасанг,
Кўнгил деган уй эшигин ёполмасман!
Бир масканни тарк этмоқдан осони йўқ,
Ҳаётимдан кетишнику амаллайсан.
Қилавергин қадрдоним кўнглингни тўқ,
Минг истаб ҳам юрагимдан кетолмайсан!