მაშ ასე, ჩემო სიყვარული, ვცდილობ გავერკვე, ვინ ვიყავი და ვინ ვარ.

ადგილმა, სადაც ვცხოვრობ, სახე დაკარგა, ისევე, როგორც მე. ყველაფერი რიგზე იქნებოდა, ამ ადგილივით რომ შემეძლოს სიახლეებთან შეგუება, მაგრამ არ მიყვარს სიახლეები, რომლებიც წინსვლის ნაცვლად უკან გვწევენ. ჰო, ჩემო სიყვარულო, ვცდილობ გავერკვე, ვინ ვიყავი და ვინ ვარ. ბოლო დროს წვიმა იშვიათი სტუმარი გახდა, როგორც სიმშვიდე. რაც აქ დავბრუნდი ჯერ არცერთი არ შემხვედრია. მაგრამ ამაზე მნიშვნელოვანი პრობლემებიც არსებობს, თუნდაც ის ფაქტი, რომ ციცინათელები გაქრნენ. ან ის ამბავი - თვითმფრინავები ძველებურად მკვეთრ კვალს რომ არ ტოვებენ. და რაც არ უნდა ატრიალო ქვა, წეროები მაინც თავის ნებაზე მიფრინავენ. ჰო, ჩემო სიყვარულო, ვცდილობ გავერკვე, ვინ ვიყავი და ვინ ვარ. ადამიანები, რომელთაც სწამთ, რომ ღმერთი არსებობს, მსოფლიოს აღსასრულზე საუბრობენ. იგივეს ამბობენ მეცნიერებიც, თუმცა მიზეზები და თარიღები განსხვავებულია, ისევე, როგორც შედეგები. მე კი ვფიქრობ, რომ გოგონასთვის, რომელსაც ჩემს თვალწინ შეეჯახა ავტომობილი - ეს უკვე მოხდა, მეცნიერულად თუ რელიგიურად არ ვიცი, მაგრამ რა მნიშვნელობა აქვს. იქნებ ჩემთვის ეს დღე იყოს უკანასკნელი, სამწუხაროდ თუ სასიხარულოდ. მაშ ასე, ჩემო სიყვარული, ვცდილობ გავერკვე, ვინ ვიყავი და ვინ ვარ.