გაუნათლებელი დღეს ჟურნალისტიც ბევრია და სხვა სფეროში - კიდევ უფრო მეტი. ზოგიერთი გადადის მათ ჭკუაზე, ვისაც ებრაელების წყევლამ უწია: შენი არ იცოდე და სხვისი არ გჯეროდესო... ის მაინც იკითხონ, რას ნიშნავს ქართული სუფრა და თამადობა! ეს არის ყველაზე შესანიშნავი ტრადიცია მათთვის, ვინც ამის ფასი იცის! კარგი თამადების მეტი რა მინახავს? სიმონიკა სხირტლაძის თამადობის შესახებ გაგონილი გექნებათ, რომელიც მართლაც, ამ საქმის უბადლო ოსტატი იყო. ასევე, განუმეორებელი თამადა გახლდათ თემიკო ჩირგაძე. მათი სუფრა იყო ტრადიციული, ხალასი და ყოველთვის იმპროვიზებული... ასეთი ნათქვამი ხომ გაგიგონიათ: იმ თამადას რა ვუთხარი, რომელიც სადღეგრძელოს სათქმელად წამოდგება და იცის, რა უნდა თქვასო... ძალიან ბევრი შემთხვევა მახსოვს, როცა სადღეგრძელოს სათქმელად წამოვმდგარვარ და არ ვიცოდი, რა უნდა მეთქვა - ამ დროს იმპროვიზაცია გადაგარჩენს. ვთქვათ, სამზარეულოდან შესანიშნავ ქალბატონს მოაქვს სუფრისთვის რაიმე შესამატებლად და შენთვის ეს ქალბატონი უცნობია. თუმცა, იმდენად ლამაზად მოდიოდა, სურვილი გაგიჩნდა, მისი სადღეგრძელო გეთქვა. ხომ ვერ ეტყვი, მე და შენ რომ ბევრი სასიკეთო საქმე ერთად გავაკეთეთ, ამას გაუმარჯოსო? ისე უნდა შეამკო, სიყალბე არ გამოსჭვიოდეს შენს სიტყვებში! ხშირად ვყოფილვარ სუფრაზე, სადაც თამადისთვის შენიშვნა მიუციათ, - ახლა ხომ ესა და ეს სადღეგრძელო უწევდაო!.. შეიძლება, სწორი შენიშვნა იყოს,

მაგრამ ორი ერთნაირად მოაზროვნე ადამიანი არ არსებობს და ყველა სუფრა ერთმანეთისგან განსხვავებული უნდა იყოს! - როგორ ახერხებთ, რომ სუფრაზე ხმაური და აყალმაყალი არ იყოს? - აი, ეს არის მთავარი! როცა სუფრაზე არ მისმენენ, ვაცხადებ: თუ შეიძლება, მოვუსმინოთ ერთმანეთს და თუ მე ბევრს ვლაპარაკობ, პირდაპირ მითხარით-მეთქი... ყველას ტაქტიანად მივმართავ და ამასაც თუ გააპროტესტებს ვინმე, ის არც არის სუფრასთან ყოფნის ღირსი! როცა თამადას ვინმე არ უსმენს, ის ან თავად უნდა წავიდეს, ან თამადა გაუშვას! ოჯახში რომ მიგიწვევენ, სუფრის წევრი შენი მტერიც რომ იყოს, ისიც უნდა დალოცო! სუფრა საქმის გარჩევის ადგილი არ არის! თამადა ხომ ყველას ლოცავს, ყველას კარგს უსურვებს და ამის მოსმენა რატომ არ უნდა გსურდეს?! ყველაფერი ჩვენს ხელთაა და ქართულ სუფრას გვინდა ულამაზესად ვაქცევთ, გვინდა - ყაყანს ავტეხთ და ყველაფერს მოვსპობთ! ქალბატონია თუ ვაჟბატონი, ძალიან კარგი იქნება, თავს თუ შეიკავებს და სიგარეტს არ მოსწევს! - ცნობილია თქვენი შეურიგებელი დამოკიდებულება საღეჭი რეზინის მიმართ... - ამ ქვეყანაზე არ მინახავს ადამიანი, რომელსაც უფრო თავხედური გამომეტყველება აქვს, ვიდრე მას, ვინც საღეჭ რეზინს აღლაჭუნებს და თან, გელაპარაკება! მღეჭავი არის თავხედზე თავხედი! ქალს რომ პირში საღეჭი რეზინა აქვს, ცალი ხელით სიგარეტს აბოლებს და მეორე ხელში ლუდს ატრიალებს - ამაზე ცუდი სანახაობა რა უნდა იყოს? ქალბატონს სინაზე ამშვენებს!.. ერთ სუფრას ძალიან კარგი თამადა უძღვებოდა. მარცხნივ შესანიშნავი ქალბატონი ეჯდა. ჰოდა, მარჯვნივ თუ გაიხედავდა, უნაკლო ქართულით საუბრობდა, მარცხნივ გამოიხედავდა და, ენა ებმოდა...

ქალბატონი გაბრაზდა, თურმე. თამადამ აუხსნა: ენა იმიტომ მებმის, რომ მეტისმეტად მშვენიერი ხარო. - საზღვარგარეთ ხშირად გითამადიათ? - ხშირად მითამადია პარიზში... მახსოვს, ფრანგები თბილისში მყავდა, სტუმრად და თამადად თემიკო ჩირგაძე დავნიშნე. თემიკომ სუფრაზე ვითომ ფრანგულად დაიწყო ლაპარაკი (სიტყვაც არ იცოდა ფრანგული). სტუმარი მომიბრუნდა და მკითხა: რომელ დიალექტზე საუბრობს, ვერ გავარჩიეო. ეს მეც თარჯიმანმა მითარგმნა, თორემ არც ფრანგული ვიცი, არც ინგლისური და არც ქართული, ნორმალურად. სტუმარს ვუთხარი, - ვერც მე გავიგე, რა ენაზე საუბრობს-მეთქი... აი, როგორც ფრანგები ჟღურტულებდნენ, ისე ჟღურტულებდა თემიკოც! უნიჭიერესი კაცი იყო! - იუმორი რამდენად საჭიროა სუფრისთვის? - ქუთაისში კაცი თამადობდა და თურმე, ასეთი სადღეგრძელო წარმოთქვა: გავიხსენოთ თამარ მეფე, დავით აღმაშენებელი, ჩვენი დიდი წინაპრებიო... ამ დროს ვიღაცას დააცემინა და როგორც იციან, სუფრის ერთ-ერთმა წევრმა ბეჭებზე დაჰკრა ხელი, - მათ მოსვლამდე არაფერი გეტკინოსო... თამადას ენამოსწრებულად უთქვამს, ისინი მოვიდნენ და მაგის კუბო არ დავდგიო?.. იუმორი აუცილებელია! ღმერთმა დამიფაროს, წინასწარ ვიცოდე, რა სადღეგრძელოს ვიტყვი. შეცდომას თუ დავუშვებ, მერე რა მოხდა?! მე ვინ ვარ, რომ არაფერი შემეშალოს? მთავარია, როგორც გურიაში იტყვიან: ნაღდი იყოს და "ბერდენკას" ტყვიაო... ჩემთვის ყველაზე საყვარელი დედის სადღეგრძელოა! ცოტა ხნის წინ კონსერვატორიაში, ქართული საგალობლები მოვისმინე და აწი თამადად სადაც ვიქნები, ფონდის "ქართული გალობა" სადღეგრძელოს ვიტყვი! ძალიან დიდ საქმეს აკეთებენ! არც ვიცი, ქართველ კაცს, ხალხურ სიმღერასა და ცეკვაზე უკეთესი რამ თუ შეუქმნია! სიმღერა არ არის ტაშ-ფანდური! ძალიან ჩამაფიქრებელი რამეა! დღეს სამსახურში ვიყავი, სადაც სტუმრად მაღალი დონის ამერიკელი ჟურნალისტები გვყავდნენ. ზრდილობიანად ითხოვეს, - რეპეტიციას ათი წუთით დავესწრებითო... ვეღარ მოშორდნენ იქაურობას და საათ-ნახევრის შემდეგ, ხუმრობით ვიკითხე: რამდენი ათი წუთი გავიდა-მეთქი? დაილოცოს ის ქართველი, ვინც მიწას ბარი დაჰკრა და "ხასანბეგურა", "ჩაკრულო" წაიღიღინა... - გაიხსენეთ თქვენთვის ყველაზე დასამახსოვრებელი სუფრა... - ამერიკაში, ქორწილში მიგვიწვიეს. არაჩვეულებრივად მიგვიღეს! ვთხოვეთ, პატარძალი გაეცნოთ ჩვენთვის და გასაცნობად გავემზადეთ, თმა გავისწორეთ, ულვაში ავიწკიპეთ... ჩემმა მტერმა დაინახა, რაც მე იქ ვნახე. თეთრ კაბაში გამოწყობილ ულამაზეს პატარძალს ველოდით და გამოვიდა ჯმუხი კაცი... დღემდე არ ვიცი, რომელი სიძე იყო, რომელი პატარძალი და ნურც მაცოდინოს ღმერთმა! ლამის გადავირიეთ... - ცნობილია, რომ ანსამბლი "ერისიონი" ბიძინა ივანიშვილს განსაკუთრებულად მოსწონს. მასთან მეგობრობთ. ხშირად ყოფილხართ ერთად სუფრაზე? - დიახ, ნამდვილად მოსწონს ჩვენი ანსამბლი ბატონ ბიძინას! გენიოსი კაცია, სასწაული პიროვნება! თავისი ქვეყნისთვის გადადებული და მოყვარული! მახსოვს, მითხრა: პარიზში თქვენი 24 კონცერტიდან 22-ს დავესწარიო... ძალიან უყვარს და კარგად ერკვევა ქართულ ფოლკლორში. ჩვენი ერთ-ერთი ურთულესი დადგმა ისე გაარჩია, ვუთხარი: ბატონო ბიძინა, ასე მგონია, თქვენი დადგმულია, იმდენად კარგად გაიგეთ-მეთქი... სუფრასთანაც შევხვდით ერთმანეთს. ის ძალიან კომუნიკაბელურია. თითით საჩვენებელი, უმშვენიერესი ოჯახი აქვს. გვიმრავლოს ღმერთმა საქართველოში ასეთი ხალხი!