მანჩესტერ იუნაიტედი“ მზად არის, რომ მათთვის სარეკორდო თანხად შეძენილი ანხელ დი მარია გაუშვას “ბარსელონაში“, იმ შემთხვევაში, თუ კატალონიური გრანდიდან მას ესპანეთის ნაკრების შემტევი - პედრო შეუერთდება.

გავლენიანი ესპანური გამოცემა AS ავრცელებს ინფორმაციას, რომ ინგლისის თასზე “არსენალთან“ გამართულ მატჩში დი მარიას მიღებული წითელი ბარათი “იუნაიტედის“ ჰოლანდიელი თავკაცისთვის “ბოლო წვეთი“ იყო.
ცხადია, ვან გაალი მხოლოდ ამ შემთხვევის გამო არ არის გაბრაზებული. არგენტინელი თავდამსხმელისგან ბევრად დიდი იყო მოლოდინი, მაგრამ მადრიდის “რეალის“ ექს-ვარსკვლავი საკუთარი შესაძლებლობების ნახევარსაც კი ვერ ავლენს “ოლდ ტრაფორდზე“.
ავტორიტეტული წყარო დასძენს, რომ ტრანსფერი განხორციელების შემთხვევაში ორივე მხარისთვის თანაბრად სასარგებლო იქნება. არსებობს საკმაოდ საფუძვლიანი მოსაზრება, რომ პედროც და დი მარიაც, საკუთარ კლუბებში თავს ბედნიერად არ გრძნობენ.
იქნება თუ არა ეს სატრანსფერო გაცვლა-გამოცვლა ამ ფეხბურთელების მომავლისთვის წინგადადგმული ნაბიჯი, ამას უახლოესი ზაფხული გვიჩვენებს.